Zinez, Sara Zozaya, Burutik, ØDEI eta GAR: Durangoko Azokan galduko ez ditugun kontzertuak

Ahotseneko kontzertuen egitaraua errepasatuta, aurtengo Durangoko Azokan galduko ez ditugun zuzenekoen zerrenda osatu dugu.

Erredakzioa

2025/12/02 - 14:07

Azken eguneratzea

2025/12/02 - 14:07

Iritsi da Durangoko Azoka eta iritsi dira Ahotsenea guneko disko aurkezpenak. Abenduaren 5ean hasi eta 8ra bitarte, kontzertuek Plateruena hartuko dute, 2025ean kaleratu diren diskoen jendaurreko aurkezpenetan.

Lau eguneko egitarauaren errepasoa eginda, honakoak dira Gaztean galduko ez ditugun bost kontzertuak. Gogoratu Durangora gerturatzerik ez baduzu Gaztearen webgunean Ahotseneko emanaldiak zuzenean ikusteko aukera izango duzula.

Zinez

Iruñerriko seikoteak Harramazka izeneko disko berria aurkeztuko du Durangoko Azokan. “B Aldea”n kontatu zigutenez, disko honetan, letretan eta jorratu dituzten gaietan esfortzu berezia egin dute.

Kanta berriez gain, abesti klasikoei buelta bat emateko grinari ekin diote Harramazkan. Hala, besteak beste, Benito Lertxundiren “Baldorba”ren doinuez baliatu dira. Poparen bidetik, zuzeneko eklektiko baten indarraz gozatu nahi baduzu, Zinezena da Durangoko Azokan galdu ezin duzun kontzertua. Abenduaren 6an (larunbata) joko dute, 16:50ean.

ØDEI

Martxoan jaso genuen Gazteako erredakzioan Goizegi Hiltzeko, ØDEI artistaren azken lana. Ohiko trap eta drill ilunari eutsita, Terapia lanean baino letra garratzagoak aurki daitezke lapurtar musikariaren lan berrian.

Diskoan “raparen ortodoxia”ri omenaldia egin diola kontatu zigun artistak. Maitasunari eta amorruari, edo “maitasunezko amorru bati” kantatzen dio ØDEIk, eta hala egingo du Durangon. Kalitate ezin hobeko rap kontzertu bat ikusi nahi badu, gerturatu lapurtar artistaren kontzertura, abenduaren 6an (larunbata) 19:10ean.

Sara Zozaya

Donostiar musikariak azaroan kaleratu du attä izeneko EP berria. Aurreko diskoaren biran bandaz inguratuta ikusi genuen Zozaya, eta oraingo honetarako oso bestelako ikuskizuna prestatu du artistak: bakarrik agertuko da musikaria, Ke Lepo ekoizlearekin elkarlanean egindako kantak zuzenean jo eta abesteko.

Negua barrutik ezagutzeko diskoa da Sara Zozayaren azkena, eta Durangon ikusiko duzun saio berezienetakoa eskainiko duela uste dugu. Abenduaren 7an (igandea) joko du, 14:30ean.

Burutik

Ipuinak da burutik talde iruindarraren hirugarren diskoa. Taldekideek “Dida!”n azaldu digutenaren arabera, aldarrikapenez beteriko lana den arren (komunikabideen botereaz, memoria historikoaz, meritokraziaz, pornoaren kontsumoaren eraginaz ari dira, besteak beste), disko “leuna eta enpatikoa” da.

Nøgen, EZEZEZ eta Berri Txarrak erreferente argiak izan dira Ipuinak sortzeko, eta Burutiken ohiko akordeoi doinuekin uztartu dituzte aipatutako eraginak. Larunbatean joko dute (abenduak 6), 21:30ean.

GAR

Aurtengo Maketa Lehiaketako irabazleek etxean aurkeztuko dute Oraina Eskuetan, euren lehen diskoa. Jimmy Jazzen eskaini zuten kontzertuan ikusi genituen estreinakoz, eta badakigu Ahotsenean ere ez direla oharkabean pasako.

Taldearen hirugarren kontzertua izango da Durangoko Azokakoa, eta “Ilargi gorria”ren tankerako kanta borobilez gozatzeko aukera emango digute. Abenduaren 7an (igandea) izango da, 15:40ean.

Gainera, Gazteak Landako gunetik egingo duen saio berezitik igaroko dira musikariak, ostiral arratsaldean.

Ahotseneko kontzertu guztien ordutegiak

Zure interesekoa izan daiteke

DAM palestinarrak, Merina Gris, Bele, Silitia eta Imarhan dira aurtengo EHZko lehen izenak

Euskal Herria Zuzenean jaialdiak 30. edizioa ospatuko du ekainaren 26, 27 eta 28an, Arberatze-Zilhekoan. Bonuak salgai daude dagoeneko, 43 euroan.

Edertasunaren bazterrak arakatzen, Verde Pratoren 'Bizitza Eztia'n murgilduta

Ibon Fernandezen galderei erantzunez, Verde Pratok 'Bizitza Eztia' diskoa, lana indartzen duen unibertsoa eta bakarlari gisa bizi dituen gazi-gozoak izan ditu hizpide. Donostiako Tabakaleran izan da, Musika Irudiak Eraikiz ekimenaren baitan.

Kiliki, EZEZEZ, Maruxak, Merina Gris eta Naxker ere Oihu Bat Palestinara jaialdian izango dira

Palestinaren aldeko elkartasun jaialdiak kartela itxi du, hainbat izen berri iragarrita. Gainera, sarrerak online eskuratzeko aukera dago gaurtik aurrera.

Aimarz, Gozategi, Malko, Maruxak, Tatta, Kaos Etiliko eta Ganibet, Bat Batean jaialdiko kartelera

Maiatzaren 15ean eta 16an egingo dute festibalaren lehen edizioa, Mendizabalan.

Zahara, Neomak, Veintiuno, Idoia eta Lamia Mari, maiatzaren 28tik 30era, Miramar Gauak jaialdian

Donostiar festibalak edizio berri bat hartuko du udaberrian. Carlos Ares, Supercremalleras, Duncan Dhu, Kiko Veneno eta Bebe ere bertan izango dira.

IZAROren bonba bikoitza, ‘La Revuelta’n: disko berria atera eta ama izango da!

Bizkaitar musikariak David Broncanoren saioan eman du albiste bikoitza. ‘Arkitektura’ izena jarri dio bere album berriari.

Marte Lasarte eta Sila Lua ‘Kabian’en elkartu dira, “Errepide” abestia elkarrekin sortzeko

Gaztearen formatuaren bigarren denboraldiko atal berria estreinatu dugu. Oraingo honetan, Marte Lasarte taldea eta Sila Lua galiziar artista elkartu dira Orozkoko Artiñano baserrian.

Niña Coyote eta Chico Tornado: 12 urteko bidaia, basamortuan barrena

Niña Coyote eta Chico Tornado bikoak estreinatu du Musika irudiak eraikiz, Gazteak eta Tabakalerak sortu berri duten ekimena. ‘Atea’ diskoaren sorkuntza eta LParekin etorri diren ikus-entzunezko proiektuak izan dituzte hizpide, Ainhoa Vitoriak gidatutako saioan.

Manifest X Palestine kontzertuak utzitakoa: erresistentziaren aldeko aldarriak, Morad eta Bad Gyalen arteko elkarlana eta Rosalíaren ezusteko agerpena

Bartzelonako Palau Sant Jordin egindako ekitaldian bildutako diru guztia Palestinako kultur proiektu eta erakundeak bultzatzeko erabiliko da.

Olaia Inziarte, Izaki Gardenak eta Nhilek Jimmy Jazzen joko dute martxoaren 13an, Martxoaren 3ko gertakarien 50. urteurrenean

Martxoak 3 elkarteak eta Jimmy Jazzek elkarlanean antolatu dute M3moria Zuzenean izeneko ekitaldia da. Kontzertuen ostean, Beat Artean kolektiboak biniloak pintxatuko ditu.

Publizitatea