IZARO: “Bizitzari leku bat egin behar diogu gure bizitzetan, bestela guzti honek ez dauka zentzurik”

IZARO hartu dugu “Dida!”n, Arkitektura izeneko disko berriari forma ematen ari den honetan. Diskoari dagokionez, abenduan entzungo dugun guztia prest duela aurreratu digu bizkaitar musikariak.

Arkitektura heldu bitartean, ama izango da IZARO. Zazpi hilabeteko haurdun dago, La Revuelta saioan kontatu zuenez, eta Gaztea Sarien ostean hilabete batzuetako atsedena hartzeko asmoa duela kontatu digu.

Haurdunaldiak diskoan izan duen eraginaz ere aritu zaigu sortzailea, arnasa hartzeko, gauzak oroitzeko eta kantatzeko arazoak izan baititu. Gainera, kantak grabatzen zituen bitartean umeak gustuko zituenak eta berdin zitzaizkionak nabaritu izan dituela dio. Oro har, baina, pozarren dago IZARO.

IZARO eta Olaia, Gaztea Sarietan

ZARO eta Olaia Inziartek ireki dute Gaztea Sarien zuzeneko emanaldien zerrenda. IZAROk berak eman digu berria: ama izan aurreko azken emanaldia izango da Gaztea Sarietakoa. 'cerodenero' bira bukatuta, bizkaitar artistak duela astebete iragarri zuen aurtengo abenduan Arkitektura izeneko lana aterako duela, baita ia zazpi hilabeteko haurdun zegoela ere.

Olaia Inziarterentzat ere urte borobila izan da aurtengoa, bada, zerrautsa disko luzea eta zura izeneko EPa kaleratu ditu, eta gurean zein munduan barrena aurkeztu dizkio jendeari.

Martxoaren 5ean ospatuko dugu Gaztea Sarien gau handia, Euskalduna Bilbaoko Urban Hall aretoan. Urtero legez, euskal musikak emandako onena sarituko dugu, eta artista horietako asko oholtza gainera gonbidatuko ditugu, galarako propio prestatutako ikuskizuna eskaintzeko.