IZARO RTVEko ‘La Revuelta’ saioan izan da bart. Albiste bikoitzarekin joan da telebistara: haurdun dago eta disko berria aterako du, abenduan. David Broncanoren saioan azaldu duenez, bizi dugun egoera nahasiaren aurrean, egitura berriak asmatu eta eraikitzeko garaia dela uste du musikariak. Hala, eusten gaituen guzti horri abestuko dio IZAROk Arkitektura izeneko lan berrian.
Irungo Ficoban aurkeztuko du lan berria, 2027ko urtarrilaren 23an, kontzertu berezi batean. Sarrerak eskuragarri daude dagoeneko, 49,50 euroren truke. Topaketa proaktiboa izango dela aurreratu du musikariak, entzuleekin batera osatuko baitu kontzertua. Joskintza, arkitektura eta arte tailerrak izango dira bertan, eta publikoarekin batera eraikiko ditu IZAROk berak eszenografia, jantzi eta abarren atal batzuk, geroago biran erabiliko direnak. Erakusketak eta solasaldiak ere izango dira, eta diskoaren sortze-prozesuaren museo tankerako bat ere bai. Guztia prest dagoenean, lehen aldiz eskainiko ditu zuzenean kantu berriak.
Haurdunaldiari dagokionez, sabela erakusteaz gain, lehen aldiz esan du publikoki umedun dagoela. Ia zazpi hilabeteko dago eta neska izango dela aurreratu du bizkaitarrak, baita erditu eta alabarekin egoteko hilabete batzuk hartuko dituela ere.
Opari gisa, IZAROren amonak eta ahizpak egindako San Blas opila eraman dio artistak Broncanori. Begiak estalita, etxean egindako opila eta erositako bat bereizteko erronka bota dio aurkezleari. Gainera, haurrak sabeletik entzuten dituen ahotsez aritu dira.
