IZARO eta Baiucaren “Xorieri” da 2025eko euskal kantarik entzunena

2025ean ateratako abesti entzunenen zerrenda osatu dugu Gaztean. Miruaren “Salda Badago” eta Gorka Urbizuren “Herri Txiki” abestiak daude zerrendako bigarren eta hirugarren postuan.
Izenik gabeko diseinua - 1

2025/12/23 - 10:04

Azken eguneratzea

2025/12/23 - 10:04

Urtearen amaiera gerturatu ahala, gure musikarien aurtengo proposamenek utzitako zenbakiei erreparatzeko unea iritsi da. Aurten kaleratu diren hamar euskal abestien zerrenda osatu dugu Gaztean, ikustaldi eta entzunaldiak publikoki erakusten dituzten bi stream plataformen (YouTube eta Spotify) datuez baliatuta.

10. Gorka Urbizuren “Zilarra”

Urte bukaeran, urriaren 22an, kaleratu du Gorka Urbizuk “Zilarra”, Bakan II EPko kantetako bat. 

Gaztearekin egindako aurkezpen berezian ezagutu genuen kanta, eta bi hilabete igaro dien honetan, urteko hamargarren kanta entzunena da Spotify eta Youtubeko bisitak kontuan izanda.

9. “Xiberutikan Mendebaldera”, 24. Korrikako abestia

Hamar eguneko epean 2025eko euskal abestirik entzunenen zerrendan sartzea lortu du aurtengo Korrikaren abestiak. ZETAK, Maixux Zugarramurdi eta Erramun Martikorenaren arteko elkarlanak 367.000 ikustalditik gora ditu YouTuben (abesti hau ez dago Spotifyen).

8. Janus Lester eta Nøgenen “Bi Begi Bi Lore”

Ekainaren hasieran, lorez beteriko bideoklip ikusgarria estreinatu zuten Janus Lester eta Nøgenek. Ordutik, elkarlanak ia 169.000 ikustaldi pilatu ditu YouTuben, eta 266.000 entzunalditik gora Spotifyn.

7. Miruaren “Morroxko”

Hamar entzunenen artean, tolosar taldearen  MIRUENEA diskoko bi abesti daude. Diskoa plazaratu eta bi astera Gazteari emandako elkarrizketa honetan, “Morroxko” singleak izandako ezusteko arrakastaz mintzo ziren Miruako kideak. Kantaren bideoklipean HOFE eta Euskoprincess musikariak, Bordon dantzariak eta Tolosako Erraldoi eta Buruhandien Elkarteko erraldoiak ageri dira. Orotara, 438.000 entzunalditik gora ditu abestia

6. ETSren “KONKISTA”

Azaroaren 30ean, Gasteizeko Buesa Arenan egindako ekitaldi jendetsuan, aurkeztu du ETSk KONKISTA izeneko disko berria. Hogei egun igaro diren honetan, arabar bandaren disko berriko bi abesti sartu dira euskal kanta entzunenen zerrendan. YouTube eta Spotifyko bisitak kontuan izanda, 467.000 aldiz ikusi eta entzun da “Konkista” abestia.

5. ETSren “TA ORAIN ZER?”

Disko berriko singlea zerrendaren top 5ean kokatu du, kaleratu eta hilabetera. Iñigo Etxezarretak berak aurkeztu zigun kanta, “Dida!” saioan. Honen hitzetan, Erritmoa gelditzeko beharrari tiraka sortu zuten abestia. Bi plataformen datuak gehituta, 475.000 entzunalditik gora ditu ETSren disko berriko lehen singleak.

 

4. IZARO eta Olaia Inziarteren “Saldu genizun”

Spotify eta YouTubeko datuen batuketa eginda, 814.000 bisitatik gora ditu bi artisten arteko elkarlanak. Bi protagonistek kontatu zigutenaren arabera, ofizioan ikasi dutenari buruzko abestia da “Saldu genizun”. Esaldi honekin laburbildu zuen IZAROk gurean: “Ikasi dugu neurtzen eta besteak konturatu gabe egiten, gainera”.

3. Gorka Urbizuren “Herri Txiki”

Urtarrilean aurkeztu zigun nafar artistak Bakan I, aurten kaleratu duen EP bikoitzaren lehen alea. Bertan, Leihotikan taldearentzat egindako “Etorkizuna Ginenean”en bertsio akustikoa eta “Herri Txiki” izeneko kanta aurkitu genituen. Bigarren honek 970.000 entzunalditik gora ditu egun, bi plataformen datuak kontuan izanda.

2. Miruaren “SALDA BADAGO”

Otsailean entzun genuen estreinakoz “SALDA BADAGO”, Mirua taldeak Maixa Lizarribar trikitilariarekin egindako singlea. Taldeko Mattinek “pop kanta borobil” gisa definitu zuen gurean, eta badirudi publikoak ere hala uste duela. Datuak batuta, 1.119.000 entzunalditik gora ditu abestiak.

 

1. IZARO eta Baiucaren “Xorieri”

IZAROk eta Baiuca galiziar artistak elkarrekin egindako “Xorieri” abestia izan da 2025eko euskal abestirik entzunena. Mixel Labegerieren “Xorieri mintzo zen” abestiaren bertsio garaikidea da, eta bizi ditugun garaietan naturarekin konektatzeko beharraz ari dela azaldu zigun IZAROk “GU” saioan. Kantak gurean izan duen oihartzun paregabeaz gain, mallabiar artistak RTVEko La Revuelta saioan abestu zuen “Xorieri”. Kontuan izandako bi plataformetako datuak batuta, gure zerrendako lehen postuan dagoen abestia 1.220.000 aldiz entzun da aurten.

Zure interesekoa izan daiteke

Gehiago ikusi
Publizitatea
X