‘Bakan II’, bi harribitxi, liluraren barrikadetan

Abbey Roaden mistika

The Beatlesekin “bereziki obsesionatuta” ez dagoen arren, Abbey Roaden (britainiar banda historikoaren estudio kutuna) grabatzea amets bat betetzea izan dela aitortu du nafar musikariak. Artea egiteko orduan, prozesua emaitzaren gainetik dagoela aipatu du Gorkak, behin baino gehiagotan. Bideko bistez gozatzeko egindako paseo horretan, Abbey Roadek erabat txunditu zuela aitortu du: “Museo moduko bat da, areto nagusiak 60ko hamarkadan bezala jarraitzen du, Paul McCartneyren pianoa bertan dago eta erabili egin genuen”.

“Sartzerakoan, atea ireki eta Stendhal moduko bat (Stendhal sindromea, edertasunak sortzen duen erreakzio fisiko eta emozioanala) sentitu nuen, badakit amorru pixka bat ematen duela, baina halako zerbait izan zen. Asko kostatu da bertaraino iristea, eta hunkigarria izan zen momentua”, erantsi du.

Londreseko esperientziarekin jarraituta, Jordi Matas musikariaren figura nabarmendu du Urbizuk: “Sekulako maisua da baxuarekin, eta komodin bat da beti, oso ideia onak izaten ditu. Estudioan itxi genituen kantak, bertan sortu ziren hainbat konponketa gehituta”.

“Diamantea” eta “Zilarra”, liluraren barrikadatik

Bakarkako ibilbideari ekin zionetik, lilurarekin tematuta bizi da Gorka Urbizu. Gauza txikien edertasuna eta samurtasuna goratzeko “barrikadan” sentitzen da artista. Eginbide horretan, “bulkadei kasu egiten” saiatu da Bakan II diskoan.

Lehen harribitxia, “Diamantea” izeneko “dantza tristea”, entsegu batean sortu eta unean bertan mugikorrean grabatu zuen. Bigarrena, “Zilarra”, Zaragozan jo behar zuen kontzertu baten soinu proban.

Letrez ere galdetu diote Vitoria eta Idigorasek. Artea azaltzea magia galtzea den ustea du musikariak, baina pozik dago egindako lanarekin. “Saiatzen naiz gero eta aratzago eta garbiago idazten. Ari naiz Eider Rodriguezen azken liburua (Dena zulo bera zen) irakurtzen eta iruditzen zait barbaridade bat gauzak esateko eta ez esateko duen zehaztasuna, nik letragintzan hori lortu nahiko nuke”, adierazi du musikariak.

Hala ere, idazketa prozesuaren “bihurrikeria” azpimarratuta, disko honekin bere kantugintzan koxka bat gora egin duela uste du Urbizuk: “Oso konektatuta nago egiten ari naizenarekin eta egiteko moduarekin”.

Arriguri bizkaitarrek egin dizkiote bi kanten bideoklipak. Harribitxien, edertasunaren eta gauza txikien loriaren hariari tiraka sortu dituzte bi piezak. Bertan, sublimea den horren bila, naturaren handitasunean galduta ageri da Gorka.