"30 ideiatik gora ditut karpeta batean gordeta, eta azkenean 11 bihurtu dira kanta”. Ideiak, zirriborroak eta abestiak bereizteko lan horretan taldekide bakoitzak duen rolaz galdetuta, aldakorra dela diote musikariek.
Honela azaldu du Mattinek :“Beti daude momentuak. Batzuetan esaten duzu: “Bua, jenio bat naiz, hau da inoiz egin dudan gauzarik onena”. Gero, hiru egunera kanta entzun eta pentsatzen duzu: “Hau inoiz entzun dudan zaborrik handiena da”. Oszilatzen zoaz, zure buruarekin kontsentsu batera iritsi arte”.
“Txandakatzen joaten gara, panikoan jausten eta bata bestea kontsolatzen. Baina egia da erabakiak hartzeko orduan, Mattinek abestien potentzialaren gaineko sekulako bisio argia duela”, erantsi du Malentxok.
Folka, mistika jainkotiarrik gabe
“Lorategi bat ezin da landatu oroitzapenean. Jauregi bat ezin da eraiki ez lorik egin bertan”. Horrela hasten da “Bihotz Bat”, diskoaren gai nagusian sakontzen duen abestietako bat.
Folklorearen transmisioak har ditzakeen forma guztiak interesatzen zaizkie Miruatarrei; jaso dugun horrekin egiten dugun guztia, alegia. Taldekideek azaldu dutenez, ondarearen inguruan asko hausnartu dute disko hau sortzen zuten bitartean. Zortziko bat popa izan daitekeela argi dute Miruako kideek, eta ez dute nostalgiaren industriaren parte izan nahi.
“Folklorea mistizismoarekin eta erromantizismoarekin lotzen da batzuetan, eta guri ez zaigu hori interesatzen. Denok hunkitu gaitezke Irulegiko Eskuarekin, baina gure asmoa ez da herri milenario bat aldarrikatzea. Kendrick Lamarrek atera duen azken diskoa folka da, tipoak West Coasteko hip-hop tradizioa hartu eta bere azken diskoan sartu du. Gurea horren baliokidea dela esan daiteke”.
Euskal folkloreari atzerrian egiten denari baino ukitu mistikoagoa ematen zaionaren susmoa dute Miruako kideek. “Tapia eta Leturiaren soinua 2Pacen edo N.W.A.-ren soinua bezain zaharra da. Tapia eta Leturiaren kasuan ematen du gure arbasoen musika dela, eta besteekin ez da asoziazio hori egiten. Ez dugu beste inongo inork baino ondare bereziagorik, guri honek emozionatzen gaitu eta diskoan sartzea erabaki dugu, besterik gabe".
"Ematen du folklorea lantzen duzunean nolabaiteko intelektuala izan behar zarela eta folklorearen manifestu moduko bat sinatu behar duzula, eta ez da horrela. Besterik gabe, guk etxean hau entzun dugu, beste milioi bat gauzaren artean, eta diskoan sartzea erabaki dugu, emozionatzen gaituelako (beste hainbat gauzak bezala)”, adierazi dute Zeberio neba-arrebek.
“Gure asmoa ez zen disko nazionalista bat sortzea. Mezu pila bat daude albumean, baina egia da gai hau instrumentalizatzea oso erraza dela; sektore, komunikatzaile eta jende askok beraien motoa saltzeko erabiltzen dute”, erantsi du Mattinek.
Hala ere, ukaezina da folk musikak azken urteetan gurean izan duen loraldia. Mattinen hitzetan, tradizioaren eta ohituren goratzeak badu interes politikotik: “Historian zehar, folkloreak krisi garaietan izan du indar handiena, eta ebidentea da egun krisi garaian gaudela. Euskal Herria identitate krisi baten erdian dago. Giro politiko guztia aldatzen ari da, euskal identitatea gauza bat izan da orain arte, eta, bapatean, ikusi dugu gure gurasoen mundua jada ez dela existitzen, ezta gu jaio ginen mundua ere. Horrelako uneetan oso erraza da tradizioan oinarritutako kontsigna faxistoideei apelatzea”.
