Kiliki: “Panfleto bat ez den arte politikoa egiteko zirrikitu gisa interesatzen zait auzoa”

'Iltze 1' izeneko estreinako bakarkako mixtapea kaleratu du Kiliki nafar artistak. Diskoan aurkituko ditugun erreferentziak, sortze prozesua eta auzoa izan ditu hizpide Gazteari emandako elkarrizketan.

Iltze 1 izeneko mixtapea estreinatu du gaur Kiliki nafar artistak. Chill Mafiak asmatutako bidea ibili ostean, bakarkako lanarekin dator Beñat Rodrigo iruindar musikaria. Berarekin izan gara, bertan aurkituko duguna hizpide.

Duela urtebete inguru kokatzen du Kilikik EParen sorrera: “Musika egiteko gogo handia nuen, eta Chill Mafiaren bukaera aurreikusten zenez, nire kabuz ekoizten hasi nintzen; eta konturatu nintzenerako banituen hiruzpalau abesti”.

Etxean sortu eta grabatu ditu mixtapeko zazpi kantak, eta berak ekoitzi ditu denak, Sunny Wright IVren (Chill Mafiako ekoizlea), Xabi Esparza (Kilikiren zuzenekoetan baxua joko duen musikaria) eta Densorekin (“Iltze 1” abestian) elkarlanean. Diskoaren nahasketa Hans Krugerrek egin du, Zubitzako (Nafarroa) Montreal Studiosen.

Benetakoa den hori

Diskoko azken kantan, “como un fugitivo”n, dago Kilikiren opera primaren muina: “Enséñame algo que sea verdad, enséñame algo que sea real” (erakutsi egiazko zerbait, benetakoa den zerbait). Entzuten ari den horrek zerbait —edozer— sentitzea bilatu du Kilikik Iltze 1en.

Beste aldean dagoenaren arreta pizteko, genero eta soinu nahasketa bitxia egin du nafar artistak. Izan ere, punkaren belaunaldi guztiak, pop armoniak, grimea, rumba, synth-wavea eta UK garagea aurkituko dituzu, besteak beste. Pieza atsegina eta itsaskorra da batzuetan, karrankaria besteetan.

Egiazkotasun horren bilaketan, zalantza gutxi izan dituela kontatu digu musikariak. Izan ere, senari jarraituz, egin duen lanarekin pozik eta konbentzituta dagoela dio Kilikik. “Azken boladan egiten dudanarekin oso seguru nago. Zerbait sortzen hasten naizenean, ez badit zirrararik sortzen, unean bertan uzten dut. Bestela, aurrera egin eta konturatzen naizenerako, gutxi gora behera, egin dudanak kanta forma du”, azaldu digu. Hala, diskoa osatzeko prozesuan atzean gelditu diren kantez galdetuta, beat bakarra baztertu duela aitortu du.

Aldi berean, zintzotasunaren goratzea eta zaurgarritasunaren aldarri txikiak topatuko ditugu. “como un fugitivo”n, adibidez, gogorra izan nahi ez duela kantatzen du Kilikik. Gizontasunaren bi aurpegi horien talkaz galdetuta, sentitzen duen moduan azaleratu duela dio musikariak: “Ez dut beste maskulinitate forma bat aldarrikatzeko intentziorik, nik horrela bizi dut. Ez dut forma bat beste baten aurrean jarri nahi, baizik eta nire burua aldarrikatu”.

Kilikiren obsesioak

DJ Assault, Las Chuches eta Luis Miguel izan dira, besteak beste, Iltze 1 inspiratu duten artistetako batzuk. Horiez gain, azkenaldian gehien entzun dituen musikariez aritu zaigu Kiliki. Bi rapero estatubatuarren diskoak nabarmendu ditu: JPEGMAFIAren I LAY DOWN MY LIFE FOR YOU eta Lil Yachtyren Let’s Stars Here. Gurera etorrita, TOC bizkaitar taldearen Jaioteak Hiltea Zor ere asko gustatu zaio.

Kronikoki online dagoen pertsona gisa, TikToken gustura bizi da musikaria, eta dagoeneko pasatzen duena baino denbora gehiago eman nahiko luke plataforma horretan. Izan ere, "scroll" singlearen bueltan emandako hainbat elkarrizketetan azaldu duenez, eduki jakin batzuen kontsumoa eta egiten den indarkeriaren pornografia salagarriak diren arren, ez dator bat "mugikorrak txarrak direla dioten teoria jordiwildeskoekin". Azken boladako eduki faboritoen artean, koltxonetetan saltoak eta akrobaziak egiten dituzten indiarren bideoak azpimarratu ditu.