Rosalíaren 'LUX': partitura bat eta sareak zoratu dituen marketing estrategia bikaina

Kataluniar artistaren laugarren diskoa heltzear dagoen honetan, bere lehen kanta izan daitekeenaren partitura eta izenburua aireratu ditu. Ordu gutxian, mundu mailako erabiltzaileek argitaratu gabeko kantaren ehunka bertsio egin dituzte.
Rosalía
author image

Erredakzioa

2025/10/16 - 15:10

Azken eguneratzea

2025/10/16 - 15:10

LUX, Rosalíaren laugarren diskoa, iristear dago. Ohi bezala, kataluniar artistak iragarpen misteriotsuak egin ditu sare sozialetan, eta zale amorratuenek osatu diote publizitate kanpaina. Izan ere, abeslariaren fanek deskubritu zuten album berriaren izena, OEPMn (jabetza intelektuala eta markak erregistratzen dituen espainiar erakundea) arakatzen, Rosalíak ‘LUX’ izena marka gisa erregistratu zuela konturatuta.

Jantziak eta agerpen publikoak, argi izpiaren bidetik

LUXen (argia, latinez) unibertsoa osatzen hasteko, Rosalíak agerpen esanguratsuak egin ditu azken hilabeteotan. Besteak beste, New Yorken jokatu zen US Open tenis txapelketan eta Parisko Modaren Astean ikusi dugu.

Jendaurrean egindako agerpen gehienetan, Motomamiren estetika (motorrak, arropa beltz eta gorria, larrua…) alde batera utzi eta ildo argiago bat jarraituz ikusi dugu. Kolore argiak, tulezko jantziak, oihal arinak eta ukitu zerutiarra duten osagarriekin jantzi izan da.

Gainera, hiru urteren ostean, sare sozialetako profileko argazkia aldatu eta distira bat jarri berri du.

Berghain, partitura bat eta zaleek egindako lehen aurrerapena

Artistaren estrategia digital bitxiaren hariari tiraka, disko berriaren aurrerapen kanta izan daitekeenaren lehen aztarna zuen Substack sare sozialean (blogak eta newsletterrak zabaltzeko sortutako sare soziala). Berghain (musika elektronikoan ikurra den Berlingo aretoa) izenpean, bi orriko partitura publikatu du. Ordu gutxira, zale askok partitura ikasi eta gitarra, piano, biolin eta akordeoi bertsioak egin dituzte, TikToken fenomeno bilakatu arte.

Pista jokoa borobiltzeko, Rosalíak bere zaleek publikatutako bertsio horietako baten audioa erabili du Instagramen egindako azken argazki karruselean. Hala, kanta inori erakutsi gabe, ehunka zalek bere abestia jotzea lortu du artistak.

Azken berria Madrilen jazo da, Callao zinemetako atarian Rosalíaren poster erraldoi bat agertu denean. Bertan, aipatutako aristaren aurpegia pentagrama eta notaz inguratuta ageri da, zuri-beltzean.

 

Lehen elkarrizketa, Radio Noia podcastean

Ohi bezala, ustekabean harrapatu gaitu Rosalíak lehen aurkezpena egiteko aukeratutako medioak. Mar Vallverdúk gidatutako Radio Noia podcastean ikusi dugu musikaria, katalan hutsean egindako elkarrizketan.

Bertan, diskoaren sorkuntzan sentitu eta bizi izan dituen esperientziez aritu da Rosalía. Besteak beste, Kataluniarekin duen lotura, zaleen espektatibak hausteko beldurra, fedearekin duen harremana eta bere aro berria osatuko duten elementuak izan ditu hizpide.

Zure interesekoa izan daiteke

Gehiago ikusi
Publizitatea
X