‘The Life of a Showgirl’: Taylor Swiften disko berriari buruzko bost bitxikeria

Swiftek estudioko hamabigarren diskoa kaleratu berri du. Ohi bezala, albumaren argitalpenarekin batera hainbat polemika sortu dira.
Taylor Swift

2025/10/03 - 13:58

Azken eguneratzea

2025/10/03 - 13:58

Ostiral goizaldean entzun dugu estreinakoz The Life of a Showgirl, Taylor Swiften hamabigarren diskoa. Hamabi kantaz osatutako bilduman, teatralitatea eta poparen energia uztartzen ditu. Aldi berean, bere ibilbide eta bizitza pertsonalari errepasoa eman dio.

Diskoaren filtrazioa

Izar handien argitalpenekin gertatu ohi den bezala, diskoa kaleratu aurretik entzuteko aukera izan ditu hainbat zalek.

Kasu honetan, ez da sare sozial bidezko filtraziorik eman, baina Targetentzat (AEBtako supermerkatu katea) propio egindako diskoaren edizioa kaleratze data baino ordu batzuk lehenago iritsi da erosi zutenen etxeetara.

Hala, zaleren batek diskoaren argazkiak eta letra zatiren bat sare sozialetara igo dituen arren, swiftien ezaugarri den leialtasuna nagusitu da, eta gehienek ez dute filtraziorik egin nahi izan.

Real Madriden aipamena

“Wi$h Li$t” izeneko abestian, diskoko zortzigarrena, espainiar futbol taldea aipatzen du estatubatuar musikariak. Kantan, ospeak berarekin dakartzan lehiak, botere harremanak eta itxurakeria salatzen ditu.

 “Dena nahi dute, kontratu bat nahi dute Real Madridekin” entzun daiteke abestiaren erdi aldera. Hala, musikariak luxuzko ikur gisa sailkatu du espainiar futbol taldea.

Charli XCXen kontrako mezua?

Swiften disko berriko “Actually Romantic” kantan, honako esaldia aurkitu dugu: “Kokainak ausart bihurtu zintuenean “Barbie aspergarria” deitu zenidala entzun nuen”.

Hitzok Charli XCXen eta Swiften jarraitzaileen arteko eztabaida piztu dute; askoren ustez, Charli XCXen “Sympathy Is A Knife” abestiaren erantzuna baita aurretik aipatutako esaldia. 

Izan ere, fan askoren ustez, britainiar musikariaren kantako “ez zaitut nire mutil lagunaren showeko backstagean ikusi nahi” Taylor Swifti zuzendutako mezua da (Matty Healey The 1975 taldeko musikariaren bikotekidea izan zen Swift, eta Charli George Daniel The 1975 taldeko bateria jolea da).

Bi artisten arteko harremana gorabeheratsua izan da. 2018an, Charli XCX Swiften teloneroa izan zen, Reputation Stadium Tour biran. 

Bira bukatuta, bost urteko haurrei abestea bezalakoa izan zela kontatu zuen britainiarrak hainbat elkarrizketetan. 

Gero, bere hitzak testuingurutik kanpo atera zituztela esan eta eskerrak eman zizkion estatubatuarrari.

charli taylor twitter
Wish List letra Taylor Swift

 

Ekoizle aldaketa

Diskoaren kredituei begira, izen bat bota dugu faltan: Jack Antonoff. Estatubatuar ekoizlea Taylor Swiften bidelaguna izan da azken diskoetan, poparen historia aldatu duen konbo aparta osatuz.

Oraingo honetan, aldiz, ez dugu Antonoffen arrastorik aurkitu. The Life of a Showgirleko kanta gehienak Max Martinek ekoitzi ditu. Aspaldiko lagunak dira Swift eta Martin. Izan ere, honek sinatu zituen Red (2012), 1989 (2014) eta Reputation (2017) albumak.

Adituen hitzetan, Antonoffen eragin indiekin alderatuta, Martinen ekoizpenak pop ukitu markatuagoa eman dio Taylorren obrari.

 

Kaleratze festa, zinema aretoetan

CDaren kaleratzearekin batera, diskoa beste modu batera gozatzeko aukera eskaini du musikariak. Mundu mailako zine aretoetan eskainiko da, gaurtik aurrera, The Official Release Party of a Showgirl izeneko filma. 

Bertan, “The Fate od Ophelia” kantaren bideoklipa, musikariaren hausnarketak eta fokutik kanpoko irudiak ikusteko aukera izango da.

Euskal Herrian, Irun (Ocine Mendibil), Bilbo (Zubiarte) eta Donostian (Garbera) izango da filma ikusteko aukera.

Zure interesekoa izan daiteke

Gehiago ikusi
Publizitatea
X