Olaia Inziartek “rita” izeneko abesti berria aurkeztu digu “Dida!”n. Rita Payes kataluniar musikariak inspiratutako kanta da gaur ekarri diguna.
Azken diskoko abestiak ez bezala, ukitu argitsua du “rita”k, bossa nova erritmoen bidetik. Kantak esperantzarako bide berri bat sortu duela kontatu digu Inziartek berak; izan ere, honen ostetik beste bi kanta datozela iragarri digu: “Honen atzetik badatoz beste bi kanta gehiago, eta horiek ere badute esperantza izpi bat”.
Portugaleteko Sastraka Gaztetxeko sukaldean grabatu dute “rita”ren bideoklipa. Kanta zuzenean entzun nahi baduzu, Beasainen (urriak 5), Pasai Antxon (urriak 10), eta Oñatin (urriak 19) emango dituen kontzertuetan izango duzu aukera.
