Zolas, ‘001’ diskoaz: “Orain arte ikasitako guztia aplikatuz, konturatu gabe, zentzudun zerbait atera zait”

001 EPa kaleratu eta astebetera, Zolas donostiar artista “B Aldea”n izan da. Lamiak taldean aritu ostean, bakarkako proiektuarekin dator ekoizlea. “Aurretik  nituen abestiak esperimentuak ziren, eta orain arte ikasitako dena aplikatu eta zentzudun zerbait egitea erabaki nuen”, kontatu digu.

Eklektikoa da bost kantaz osaturiko disko laburra. Ekoizle gisa bidean ikasi duenaz galdetuta, bi maxima bota ditu: ahalik eta sinpleen, hobe; eta hasieratik azkar ateratzen bazaizu, seinale ona. Kantak sortzeko erraztasuna duen arren, gehienak kajoi batean geratzen direla kontatu digu Zolasek. Izan ere, 30 bat abesti inguru alboratu ditu orain arte.

Diskoa zuzenekora eramateko asmoa duela aurreratu digu musikariak.