Britainiar elektronikaren bi izar, Bilbao BBK Liven lehen eguneko kartelean

Calvin Harris, David Byrne eta FKA Twigs dira Kobetamendiko jaialdi ezaguna irekiko duten hiru kartel buruak. Gainera, GAR Gaztea Maketa Lehiaketaren irabazleen kontzertuaz gozatzeko aukera izango dugu, 17:30ean.
Calvin Harris

2026/07/08 - 17:20

Azken eguneratzea

2026/07/08 - 17:20

Bilbao BBK Liven hogeigarren edizioak gaur arratsaldean irekiko ditu ateak, GAR iazko Maketa Lehiaketaren irabazleen kontzertuarekin (17:30). Une horretatik aurrera, festibalak hiru eguneko programazio eklektikoari ekingo dio, igande goizaldera arte.

Lehen egun honetan, britainiar elektronikaren bi izen handik hartuko dute Nagusia oholtza: FKA Twigs eta Calvin Harris. Lehenak Eusexua izeneko disko esperimentala aurkeztuko du Bilbao BBK Liveko publikoaren aurrean. Gurean izango da 22:30ean,  AEBetako bira eta Mexikoko AXE Ceremonia ekitaldian eta Coachellan eman behar zituen zuzenekoak bertan behera utzi dituen urtean.

Jarraian, Calvin Harris musikari, DJ eta ekoizleak 20 urteko ibilbide profesionalean ondutako hitak eskainiko ditu. Dance musikaren ikurrak 01:40ean izango du emanaldia, jaialdiko oholtza handiena ixteko.

GARekin batera, Sara Zozaya euskal musikariak attä diskoa aurkeztuko du San Miguel agertokian. Arratsalde erdi aldera, espainiar popa izango da osteguneko protagonista, Las Petunias (18:15), Belén Aguilera (19:00) eta Dani Fernandezen (20:00) kontzertuekin.

Ilundu ostean, hemlocke springs estatubatuar kantariak logelako popa eta sintetizadore ameslariak eskainiko ditu, Johnnie Walker karpan (21:55). Repsol gunean, berriz, Fatoumata Diawara Maliko musikari, aktore eta aktibista ikusteko aukera izango da, 23:15ean): soula, jazza eta bere herrialdeko musika tradizionala, galdu ezineko zuzenekoan.

 

Eskumuturrekoen bilketa

Astelehenetik, jendetza bildu da BBK Aretoaren aurrean, Bilbao BBK Liveko sarrerak eskumuturrekoekin trukatzeko. Eskumuturrekoa jaialdira sartzeko ez ezik, eremuan edozer erosteko ere ezinbestekoa da; ez da eskudirurik ez eta kreditu-txartelik onartuko. 

Horrez gain, eskumuturrekorik gabe ezingo da jaialdirako autobusa hartu.

 

Gaztearen saio berezia

18:00etan hasi eta 22:00ak bitarte, Liher Larrañaga, Julen Idigoras, Maite Garmendia eta Ibon Fernandezek bi saio berezi egingo dituzte. Jaialdiko gonbidatuak, ohiko kolaboratzaileak eta lagun berriak gonbidatuko dituzte festibalerako prestatutako set-ean.

Bi saioak streaming bidez izango dira ikusgai, Gaztearen YouTubeko kanalean eta webgunean. Gainera, Gazteako sare sozialetan (X, Instagram eta TikTok) giroaren eta kontzertuen inguruko informazio osatua izango duzue, uneoro.

Doako kontzertuak, Bilbon

Jaialdiak iraun bitartean, Bereziak Bilbao BBK Liveren kontzertu errenkadak BIlboko hainbat espaziotara eramango du Kobetamendiko giroaren lagintxo bat.

Ostegunean, uztailak 9, jaialdiaren 20. urteurrena ospatuko den edizioa abiatuko den egunean, Belen Aguilerak kontzertua emango du BBK Salaren kanpoaldean, Kale Nagusian (13:00).

Iragarkia
18:00 - 20:00

Zure interesekoa izan daiteke

Gehiago ikusi
Publizitatea
X