20 urte, 20 une gogoangarri: Bilbao BBK Liven historian mugarri bihurtu diren kontzertuak

Bilboko musika jaialdi ezagunak hogei urte bete ditu aurten. Bilbao Live izeneko 2006ko lehen edizio horretatik gaur egunera arte, Kobetamendin bizi izan direnak bildu ditugu Gaztean.
Paragrafo-testua - 1

2026/06/23 - 16:09

Azken eguneratzea

2026/06/23 - 16:09

Guns N’Roses, ‘Bilbao Live’n

2006ko udan, Bilbok Bilbao Live izeneko jaialdiaren lehen edizioa hartu zuen. Uztailaren 13tik 15era, 50.000 lagunetik gora bildu ziren Kobetamendin. 40 artista inguruko kartelarekin, nazioarteko rock eta pop talde ezagunenetariko batzuk bildu zituen jaialdiaren lehen edizioak. Besteak beste, Guns N’Roses, Ben Harper, Placebo, The Cult, The Pretenders, Deftones, Andrés Calamaro eta Los Planetas zuzenean ikusteko aukera izan zen. Gatibu, El Columpio Asesino, El Inquilino Comunista eta Zodiacs euskal taldeek ere Kobetamendin jo zuten.

Bilbo eta inguruko musika zaleek nostalgiaz oroitzen dute festibalaren lehen edizioa. Horietako asko Guns N’Roses estatubatuarrak ikusteko erosi zuten tiketa, eta bertan bizitakoa betirako gelditu zaie iltzatuta. Los Angelesen sortutako bandak “Welcome To The Jungle” ereserkiarekin ireki zuen pirotekniaz eta konfetiz lagundutako kontzertua, iragarrita zegoena baino ordu eta laurden geroago, Axl Rose taldeko burua berandu iritsi baitzen Loiuko aireportura. 

Metallicaren kontzertu jendetsua

2007an, egun ezagutzen dugun izena, Bilbao BBK Live, jarri zioten jaialdiari. Lehen edizioaren arrakasta ikusita, antolatzaileek rockaren aldeko apustu argia egin zuten, Metallica, Iron Maiden eta Red Hot Chili Peppers elkartu zituen kartelarekin. Bi asteburutan banatu zuten jaialdia eta Fito & Fitipaldis, Incubus, My Chemical Romance, Fermin Muguruza eta Berri Txarrak ere bertan izan ziren.

Hiru kartel buruen kontzertuak sekulakoak izan ziren arren, Metallicarena izan zen jendetsuena: 40.000 lagun inguru. Kontzertuan izan zirenek estatubatuar bandaren errepertorio bikaina oroitzen dute, azken diskoaren promozioa atzean utzi eta taldearen hit historikoak jo baitzituzten.

 

2008: Kobetasonic eta Bilbao BBK Live

2008an, Bilbao BBK Liven antolatzaileek Kobetasonik izeneko jaialdi berria aurkeztu zuten, Judas Priest eta Kiss buru zituen kartelarekin. Hala, musika estiloak markatutako banaketa egin zuten: rock eta metal doinuak Kobetasonicen, eta pop eskaintza zabalagoa Bilbao BBK Liven. Poparen aldeko apustu horren baitan, The Police, R.E.M., Tequila eta Madness izan ziren jaialdiko izen handiak. Lenny Kravitz, ZZ Top, The Prodigy eta Garik (edizioko euskal artista bakarra) osatu zuten kartela, beste hainbat artistarekin batera.

Eguraldiak baldintzatutako jaialdia izan zen 2008koa. Izan ere, festibaleko lehen egunean 35 gradu egin zituen, eta bigarrenean sekulako euritea jasan behar izan zuten. Hezetasuna, plastikozko xirak eta lokatza, estreinakoz, Bilbao BBK Liven.

 

Britainiar banden urtea: Depeche Mode, Placebo eta Primal Scream

2009an, Bilbao BBK Livek Erresuma Batuko talde handienetako batzuk bildu zituen Kobetamendin. Bertaratu zirenek Primal Scream, Placebo, Editors, Kaiser Chiefs, Supergrass eta Babyshambles artistak Jane’s Addiction estatubatuarren eta Vetusta Morla espainiarrekin batera ikusteko aukera izan zuten.

Askoren ustez, 2009an nabaritu zen estreinakoz nazioarteko turisten presentzia. Jaialdiak emandako datuen arabera, ekitaldira joan zirenen %7 Erresuma Batuko turistak ziren, eta %6,3 frantsesak.

Kobetasoniken bigarren (eta azken) edizioa egin zuten urte bereko ekainean. Aurreko urteko ildoari jarraituz, rock gogorrak markatutako jaialdia izan zen. Bertan izan ziren Marilyn Manson, Machine Head, Gojira, Mötley Crüe, Dream Theater eta Idi Bihotz besteak beste.

2010: Rammstein eta Pearl Jam

Kobetasoniken desagerpenarekin, Bilbao BBK Livek rock eta metal eskaintza berreskuratu zuen, tenperatura altuek baldintzatutako jaialdian. Hala, Rammstein, Pearl Jam eta Faith No More izan ziren edizioko izen handienak. Rise Against, Slayer, Bullet for my Valentine, Biffy Clyro, Capsula eta Manic Street Preachers ere Kobetamendin izan ziren, uztailaren 8tik 10era.

Rammstein alemaniar banda ezaguna Bilbon ikusteko lehen aukera izan zen jende askorentzat (2009an Barakaldon jo zuten), eta bertan izan zirenek sekulako kontzertuaz gozatu zutela oroitzen dute. Taldearen su leherketa eta piroteknia ikuskizunak aho bete hortz utzi zuen kontzertuko publikoa.

Festibaleko azken egunean, Pearl Jam estatubatuar taldeak 30.000 pertsonatik gora bildu zituen Kobetamendin. Seattlego grunge bandak bi ordutik gorako kontzertua eman zuen, euren ibilbideko abesti ezagunenez osatutako errepertorioan.

 

Amy Winehouse ikusi ez genuen urtea

Coldplay, The Black Crowes eta Amy Winehouse ziren 2011ko Bilbao BBK Live jaialdiko kartel buruak. Ekaina bukaeran, Winehousen lantaldeak Europako bira bertan behera uztea erabaki zuen, abeslariaren osasun arazoak tarteko. Hilabete geroago,  uztailaren 23an, musikaria hilda aurkitu zuten, Londreseko etxean.

Suede rock alternatibo taldeak ordezkatu zuen soul kantaria Bilbon, inoizko ediziorik jendetsuenean. 103.000 pertsonatik gora bildu zituen 2010eko edizioak. Kobetamendin izan zirenek Coldplayren egunean, jaialdiko lehena, zegoen jendetza gogoratzen dute.

Blondie, The Chemical Brothers, Kasabian, Thirty Seconds to Mars, Vetusta Morla eta Ken Zazpi bandek ere bertan jo zuten, baita Gaztea Maketa Lehiaketaren lehen saria eraman zuten Enkore bilbotarrak ere.

2012: ordura arteko kartelik indiena eta laugarren oholtzaren sorrera

2012a Radioheaden urtea izan zen askorentzat. Oxfordeko boskoteak 40.000 lagunen aurrean jo zuen Bilbao BBK Liven bigarren egunean. The Cure, Garbage, Keane, The Kooks, Snow Patrol, Mumford & Sons, Bloc Party, Vetusta Morla, Lori Meyers eta Sum 41ek ere jo zuten jaialdiaren seigarren edizioan. Euskal taldeek inoizko presentzia handiena izan zuten 2012an; bertan izan ziren Belako, McEnroe, Zea Mays eta Lauroba.

Aurretik zeuden bi oholtza nagusiei eta karpari agertoki berri bat batu zitzaien, eta Belako mungiarrek ireki zuten jaialdiko lehen egunean, Maketa Lehiaketa irabazi osteko sari gisa.

Biffy Clyro, euskal publikoarekin txundituta

Depeche Mode, Kings of Leon eta Green Dayek osatu zuten 2013ko edizioko kartelaren goialdea. Two Door Cinema Club, PiL, Editors, The Vaccines, Vampire Weekend, Alt-J, Fermin Muguruza, Delorean eta We Are Standardek ere Kobeta gainean jo zuten, aurreko urteko markak hautsi zituen edizioan.

Kartel buruak ez ziren arren, Biffy Clyro rock taldeak asteburuko kontzertu gogoangarrienetarikoa eman zuen, Opposites diskoa kaleratu berritan. Eskoziar bandako kideak ohiko energiarekin agertu ziren oholtzara, eta emandako indarra bueltan jaso zuten. Lekukoek oroitzen dutenaren arabera, izerdiz blaitutako kontzertu laburra izan zen, eta musikariak erabat harritu ziren jaialdiko publikoak emandako babesarekin.

Green Day estatubatuarrek ere sekulako zuzenekoa eskaini zuten, jaialdiaren azken egunean: punk-rock kaliforniarra, piroteknia eta hitak. Bandak jaialdietako errepertorioa atera zuen oholtza gainera, energiaz beteriko hartu-emana sortuz. Billie Joe Amstrong taldeko buruak publiko arteko hainbat zale igo zituen taula gainera.

 

Lehen 'sold out'a

Franz Ferdinand, The Prodigy, The Black Keys, Crystal Fighters, Phoenix, Bastille, MGMT, The Lumineers eta Band of Horses izan ziren edizio honetako protagonista nagusiak. Jaialdia sortu eta eta 9 urtera, Bilbao BBK Livek edizioko tiket guztiak saldu zituen 2014an. Hala, lehen aldiz eskegi zuten “sold out” kartela, 120.000 sarrera salduta. Jendearen erantzun masiboari aurre egiteko, jaialdiak bi eszenatoki berri estreinatu zituen urte honetan.

Bertan izan zirenek ez dute berehalakoan ahaztuko Bastille britainiarren indie-pop indartsuak eta The Prodigyren dance elektronikoak gorputzean eragin ziena. Euskal taldeen artean, Belako izan zen izarra. 2012ko lehen aldiko arazo teknikoak alde batera utzita, bizkaitar bandak publikoa erotu zuen, egun argiz, Bele Beltzak Baino Ez eta AAAA!!!! EPak kaleratu berritan.

2015: Museren urtea

Mumford and Sons, The Jesus and Mary Chain eta Muse izan ziren Bilbao BBK Liven hamargarren edizioko plater nagusiak. Disclosure, Counting Crows, Future Islands, Alt-J eta Azealia Banks nazioarteko artistak ere bertan izan ziren, baita Delorean, Zea Mays eta Larregi euskal taldeak ere.

Museren urtea izan zen 2015a. Britainiar rock taldeak larunbateko sarrerak agortu zituen, eta ordu eta erdiko kontzertu euritsuan dena eman zuen, askorentzat Bilbao BBK Liven inoiz eskaini den kontzertu onena emanez.

 

Belakoren kontzertua eta C Tangana eta Rosalía, elkarrekin, Bilbao BBK Liven

Arcade Fire, Pixies, Foals, New Order, Tame Impala, Chvrches, Grimes eta Wolf Aliceren urtea izan zen 2016a, baita Yeras & Years, Belako, Dekot, Love of Lesbian eta Sophierena ere.

Abangoardiako pop eta rockaren zaleek bereziki gozatu zuten jaialdiaren edizio hau. Hala ere, gerora etorri den arrakasta olatuaren aurrekari gisa, 2016ko jaialdian bizitako une hau aukeratu dugu Gaztean: C Tangana hasiberria eta oraindik guztiz ezezaguna zitzaigun Rosalía, elkarrekin, “Antes de morirme” kanta abesten. Gainera, Ibon Fernandez Gazteako esatariak C Tangarekin hitz egiteko aukera izan zuen.

 

2017: Cage The Elephant eta Two Door Cinema Club, bigarren ilarako artisten arrakasta

Ricardo Cavolo artista ezagunak diseinatu 2017ko edizioko iruditeria. Kartel koloretsu horretan, Depeche Mode, The Killers, Die Antwoord, Justice, Phoenix eta The 1975 ziren izen handienetako batzuk. Hala ere, izen txikiek egin zuten iraultza. Cage The Elephant estatubatuarrek zuzeneko gogoangarria eman zuten, egun argiz, jaialdiko lehen egunean. Kentuckyko taldeak zaleak aztoratu zituen, minutu gutxiren bueltan, oholtza gainean zein azpian (musikariak publiko artera jaitsi ziren).

The Killersek jendetza bildu zuen Kobetamendin, jaialdi baterako errepertorio ezin aproposagoarekin. Arazo teknikoz jositako kontzertua izan zen arren, Bilboko publikoak ezin beroago hartu zuen Brandon Flowersen banda.

Two Door Cinema Club azken eguneko bigarren platera zen, eta ez zuen hutsik egin. Iparrirlandar bandak zuzeneko talde bat zela erakutsi zuen, taldearen hastapeneko arrakastez osaturiko setlistarekin. Euripean, publikoak taldearen abesti ezagunak oihukatu zituen, hasi eta buka.

 

Florence + The Machine: 12 urte eta gero, emakume bat kartel buru

Florence + The Machine izan zen Bilbao BBK Liveko lehen emakume kartel burua. Florence Welchen bandak berezkoa duen energia publikoari helaraztea lortu zuten, musika akelarre bizian.

The XX, The Chemical Brothers eta Gorillaz izan ziren 2019ko headlinerrak. Bad Gyal, Carolina Durante, Bomba Estéreo, Noel Gallagherren banda, Lukiek eta Rural Zombies ere bertan ikusi genituen.

 

Rosalíaren bigarren aldia, ‘El Mal Querer’en arrakasta eta gero

2019an, Rosalía Bilbao BBK Livera itzuli zen. C. Tangaren kolaboratzaile gisa aurkeztu zitzaigun 2016an, eta hiru urteren bueltan, kataluniar artista jaialdiko kartel buruetako bat zen. El Mal Querer disko arrakastatsuko abestiak jo zituen Bilbon, baita “Con Altura” eta “Yo x Ti, Tu x MI” J Balvin eta Ozuna reggaetoi artistekin egindako kolaborazio dantzagarriak ere.

Kartel buruei dagokienez, rock independentearen aldeko apustua egin zuen jaialdiak, Weezer, The Strokes eta Liam Gallagherekin. Hala ere, musikari urbanoek inoiz baino toki handiagoa hartu zuten, Nathy Peluso, Antifan, Cecilio G, Mueveloreina, Ms Nina, Kero Kero Bonito, Delaporte eta Cupidoren zuzenekoekin.

2020: bertan behera, pandemia tarteko

Koronabirusaren pandemiak gure etxeetan konfinatu gintuen 2020ko otsailean. Hala, Bilbao BBK Live bertan behera gelditu zen, eta ez genuen Kendrick Lamar, Caribou, The Killers, Pet Shop Boys, Bad Bunny eta Supergrassek osatutako kartelaz gozatzeko aukerarik izan.

Udazkeneko edizio berezia

2021ean, koronabirusaren krisiaren ondorioz hartutako segurtasun neurriak tarteko, Bilbao BBK Livek edizio berezi bat prestatu zuen. Udazkenean egin zen jaialdia, bi asteburutan banatuta, Bilbao Arenan.

Musukoa jantzita eta aforo mugatuarekin, Teenage Fanclub, The Hives, Mando Diao, Rigoberta Bandini eta Rodrigo Cuevas ikusteko aukera izan zen Bizkaiko hiriburuan.

 

Stromaeren erakustaldia, 2022ko edizioan

Pandemiako segurtasun neurriak atzean utzita, Bilbao BBK Livek inoizko kartelik luzeena prestatu zuen 2022rako. LCD Soundsystem, Placebo, Moderat, The Killers, Stromae, Pet Shop Boys, J Balvin, M.I.A., Phoebe Bridgers, Supergrass eta Bomba Estereo ikusi genituen, baita Zahara, Moderat, Ginebras, Carolina eta Romy ere.

Jaialdiko bigarren egunean, The Killers eta Stromaek eraman zuten publikoaren babesik handiena. Oraingo honetan, Flowersen bandak inongo arazorik gabe jo zituen “Mr. Brightside”, “Somebody Told Me” eta “Spaceman” klasikoak.

Goizaldea igarota, Stromae belgikar musikariak sekulako erakustaldia egin zuen jaialdiko oholtza nagusian. Multitude diskoa kaleratu berritan, musika, argi eta eszenografia itzelaz gozatzeko aukera eman zigun, “Papaoutai”, “Santé” eta “Alors On Danse” klasikoen eskutik.

 

2023: euskal taldeen urtea

Azken urteetako joera eklektikoari eutsita, Florence + The Machine, Arca, Pavement, The Blaze, Duki, Arctic Monkeys, IDLES, Arde Bogotá, Rojuu, 070 Shake eta Villano Antillanoren zuzenekoetan izan ginen 2023an.

Guretik atera gabe, ordezkaritza oparoa izan genuen Kobetamendin: Bengo, Txopet (Gaztea Maketa Lehiaketako irabazleak), Ben Yart, Eneritz Furyak, Hofe X 4:40 eta Merina Gris ikusteko aukera izan genuen, hiru egunetako arratsalde eta iluntzeetan.

 

Lokatza, Jungle eta Arcade Fireren urtean

Bi oholtzekin hasi zen jaialdiak zazpi izan zituen 2024an. Grace Jones, Los Planetas, Prodigy, Massive Attack, Air, Alcalá Norte, El Columpio Asesino, Zea Mayz, Amaia, Slowdive, Jungle eta Shinova Kobetamendin izan ziren, euriak eta geroko lokatzak markatutako edizio jendetsuan.

Arcade Fire zen edizio honetako amu nagusietakoa, eta kanadiar bandak ez zuen hutsik egin. Leporaino betetako oholtza nagusian, azken 20 urteetan ondutako arrakasten bilduma berezia eskaini zuten, bandaren lan bikainaz lagunduta. Jungle britainiar kolektiboak ere jende andana bildu zuen Kobetamendin, elektronika, soul eta funk festa aparta eskainiz.

2025 eta Raye, euripean

Kylie Minogue, Pulp, Michael Kiwanuka, Nathy Peluso, Bad Gyal, Carolina Durante, Kneecap, Raye, Amyl and The Sniffers, Judeline eta Amaia izan ziren 2025eko edizioko protagonistetako batzuk. Britpopa, soula, urbanoa, punka, hard rocka, rapa, popa eta elektronika, beste behin, Kobetamendin.

Bigarren egunean botatako euri zaparradak kontzertu batzuk atzeratu eta besteren bat bertan behera uztea eragin zuen. Geure buruei jaialdia bertan behera geldituko ote zen galdetzen genion unean, Raye britainiar soul musikariak Nagusia Oholtza hartu zuen, zaparradak sortutako atmosfera goibela argitu zuen talentu erakustaldiarekin.

Aurten, zer?

2026ko ediziorako egunak falta diren honetan, Calvin Harris, Robie Williams, Lily Allen, FKA Twigs, IDLES, Charlotte de Witter, La M.O.D.A., Ralphie Choo eta Horsegiirl ikusteko irrikaz gaude.

Etxekoen artean, ez ditugu galduko GAR, BARRRK, Sara Zozaya, Aimarz eta Marte Lasarteren kontzertuak. Gainera, hiru egunetan zehar gertatzen den guztia zuzenean kontatuko dizuegu, irrati eta sare sozial bidez.

Zure interesekoa izan daiteke

Gehiago ikusi
Publizitatea
X