Bilbao BBK Livek Mendian izeneko “familia jarduera” berria aurkeztu du

Bilbao BBK Livek Mendian izeneko ekimen berri batekin ospatuko du festibalaren 20. urteurrena. Ekainaren 7an izango da, Kobetamendin. Jaialditik prentsa ohar bitartez adierazi dutenez, “familiarteko jarduera bat izango da, naturaren erdian eta sarrera librekoa”.

12:00etan hasi eta 21:30era arte, natura auditorio bihurtuko dute, Zaborra, Komedia eta Orkestra gune bereiztuetan. 

Zaborra espazioan, musikariek zaborrarekin, jostailuekin, tramankuluekin eta berrerabilitako materialekin egindako tresnak joko dituzte. Bertan izango dira Cateurako Birziklatuen Orkestra, Turkiatik etorritako Fungistanbul, Trashbeatz belgikarrak eta The Wackids frantziarrak. 

Barrea izango da Komedia espazioaren ardatza; Grison, Rakel Molina eta Valeria Ros umoregileen “proposamen lotsagabe eta ironikoekin”. Azkenik, Orkestra gunean, musika klasikoa izango da nagusi, Suakai Philharmonic orkestra sinfonikoaren eskutik.

Hirian, Bilboko Zorrotza auzoan

Bezperan, ekainaren 6an, Zorrotza auzoko kaleek 20 artista inguru hartuko dituzte. Hirian ekimeneko programazioaren baitan, ska, rock, R&B eta rap doinuak entzuteko aukera izango da. 

Bertan izango dira Australian Blonde, Betto Snay, Buhos, Colectivo Da Silva, Dav’ Kingston, Faenna, Juantxo Skalari & La Rude Band, Laaza, Marwán, No Quiero, Samantha Hudson, Suzete, White Coven eta Xavibo musikariak. 

Gainera, DJei eskainitako txokoan, Bihotza, Inés Hernand, Daniless eta Amaia Yaniz artisten showaz gozatzeko aukera izango da.

Eguneko programazio osoa doakoa izango da, eta kontzertuak hainbat gunetan banatuko dituzte: tren geltokiaren ondoko plaza, frontoia, Azoka parkea eta Zorrotzako kantxa.