Bilbao BBK Liven galduko ez ditugun 10 kontzertu

Kobetamendin joko duten taldeen errepasoa eginda, ikusi nahi ditugun 10 zuzenekoen zerrenda osatu dugu Gaztean.
Paragrafo-testua - 1

2026/06/26 - 14:34

Azken eguneratzea

2026/06/26 - 14:34

Uztailaren 9tik 11ra, Calvin Harris, David Byrne, Robbie Williams eta Interpol nazioarteko artistek Bilbao BBK Live musikaz bustiko dute, jaialdiaren hogeigarren urteurrenean. Izen handiez gain, ezagutu eta deskubritu nahi ditugun artisten zerrenda ondu dugu Gaztean.

1. Lily Allen

2025a Lily Allen britainiar artistaren urtea izan da. Azken zazpi urteetan musika berririk kaleratu gabe egon ostean, West End Girl diskoa ekarri digu Allenek. David Harbour (Strager Things telesail ezaguneko aktoreetako bat) bikotekide ohiarekin banatu osteko krisi emozionala dago LParen erraietan, eta txutxumutxuak txutxumutxu, industriako profesionalen zein zaleen babes paregabea jaso du bildumak. 

Londresko kantariaren lehen aldia izango da Bilbao BBK Liven. Larunbatean joko du (uztailak 11), 00:15ean, San Miguel oholtzan.

2. Dellafuente

Granadar musikariarena aurtengo karteleko izen handietako bat da. Duela egun gutxi kaleratutako BRIGADO disko berriaren aurkezpen biraren baitan ariko da Bilbao BBK Liven.

Musikariak historia egin zuen 2025ean Madrileko Riyadh Air Metropolitano estadioan egindako kontzertu bikoitzarekin. Rap musikariak andaluziar folklorea eraman zuen Madrilera, doinu urbanoak eta folklorikoak uztartzen zituen errepertorioarekin, izar itxurako oholtzan, 360 formatuko kontzertua eskainita. Bi eguneko datuak kontuan izanda, Dellafuentek 135.000 lagun inguru bildu zituen, eta Judeline, Lia Kali, Rels B eta Morad artistak gonbidatu zituen oholtzara, besteak beste. Larunbatean joko du (uztailak 11), 01:20ean, Nagusia oholtzan.

3. GAR

Jon Garcia durangarraren musika proiektua izan da 2025eko Maketa Lehiaketaren irabazlea. Iritsi da Bilbao BBK Live eta iritsi zaie sariaz disfrutatzeko unea. Jaialdiaren ateak irekiko dituzte uztailaren 9an (osteguna), 17:30ean, Johnnie Walker oholtzan.

Taldearen “Ilargi gorria” abestia etengabe entzun dugu Gaztean, eta zuzeneko bertsioa berriz entzuteko irrikaz gaude.

 

 

4. FKA Twigs

Egiten duen musikaren kalitateaz gain, bere zuzeneko bat ikusteko zailtasunagatik aukeratu dugu britainiar artista. Azken urtean, FKA Twigsek AEBetako bira bertan behera utzi du, baita Mexikoko AXE Ceremonia ekitaldian eta Coachellan eman behar zituen zuzenekoak ere. Dena ondo bidean, Kobetamendin ikusiko dugu ostegunean (22:50), Nagusia agertokian.

Eusexua da FKA Twigsen azken lana, “askapen ariketa eta sorkuntza prozesu kaotiko” baten emaitza. Artista esperimental honen inguruan gehiago jakin nahi baduzu, entzun ALAI kolaboratzaileak “B Aldea”n kontatu zigun hau.

FKA twigs

 

5. IDLES

Punk britainiar garaikidearen ikurretako bat da IDLES banda. 2026ko honekin, laugarren kontzertua emango dute Bilbao BBK Liven (2017, 2019 eta 2023an ere Kobetamendin izan ziren).

Bristoleko bandaren TANGK diskoko kantak nazioarteko zerrenda alternatibo guztietan sartu dira. Energia deskarga indartsu baten bila bazabiltza, ez galdu IDLES, larunbatean (23:00), Nagusia oholtzan.

El grupo británico Idles es uno de los nuevos confirmados

 

6. Las petunias

Punk-popa eta Bilbao BBK Liven ikusiko duzun show dibertigarrienetako bat. Cecilia Soto, Elsa Moreno eta Natalia Montesek 2020an osatu zuten banda, Madrilen. Ordutik, Aiko el Grupo eta Cariño taldeen telonero izan dira, eta “Marcelo Criminal”, “No necesito estar sola”, “La cena”ren tamainako hitak oparitu dizkigute.

Taldearen letra zorrotzak oihukatu eta euren “punk panpoxa”z gozatzeko prest gaude. Uztailaren 9an (osteguna) joko dute, Repsol agertokian, 18:15ean.

 

7.  BARRRK

Ez zuten sari potoloa eraman, baina iazko Gaztea Maketa Lehiaketako harribitxietako bat izan ziren. Elektronika biszerala, gitarrak, erritmo hipnotikoak eta berehalakoan ahaztuko ez duzun zuzeneko bat.

Ikusi Maketa Lehiaketako finalean eman zuten erakustaldia eta esan galduko dituzula. Johnnie Walkerren ikusi ditugu, larunbatean, 17:30ean.

8. Charlotte de Witte

Azken urteetan egindako elektronikaren aldeko apustuan, Charlotte de Witte belgikar DJ eta ekoizlea da aurtengo izen handietako bat. Ukitu iluneko technoaren bidetik, bidaia hipnotiko batean murgilduko gaitu.

Tomorrowland eta EDC jaialdi entzutetsuetan jo berritan, Kobetamendin izango dugu musikaria, larunbatean (uztailak 11), San Miguel oholtzako itxieran (02:45).

 

9. CMAT

Irlandar country pop alternatiboa Bilbao BBK Liven? Bai, CMAT irlandar musikariaren eskutik. Egiaz beteriko kantak, umore zorrotza, ironiaz beteriko letrak, koloreak eta grina, hori eta askoz gehiago eskainiko digu CMATek.

Musikaria Bartzelonako Primavera Sound jaialdian egon berri da, EURO-COUNTRY izeneko diskoa aurkezten. Bere unibertsoan murgilduko gara, ostiralean (uztailak 10), Repsol agertokian (01:30).

 

10. horsegiirL

Gema ezkutu bat, karteleko izen ertainen artean. Alemaniatik dator eta zaldi aurpegia du. Ekoizlea, musikaria eta DJa nazioarteko klub eszenako promesa handienetarikoa da. BPM altuak, erritmo itsaskorrak, “hardcore alaia”, proposamen artistiko landua eta edonor dantzan jartzeko moduko doinuak aurkituko ditugu bere sesioan.

Repsol oholtza itxiko du larunbatean, 01:45ean.

Zure interesekoa izan daiteke

Gehiago ikusi
Publizitatea
X