Bilbao BBK Liven galdu ezin dituzun 11 kontzertu, Gaztearen eskutik

Aurtengo kartelaren errepasoa eginda, Kobetamendin galduko ez ditugun zuzenekoen bilduma osatu dugu erredakzioan, gustu eta kolore guztiak kontuan hartuta.
Carolina Durante actuará el 22 de julio en la Zurriola
author image

Erredakzioa

2025/07/04 - 14:59

Azken eguneratzea

2025/07/04 - 14:59

Egunak falta dira aurtengo Bilbao BBK Liven edizioa hasteko, eta Gaztean hasi gara egingo dugun kontzertuen ibilbidea diseinatzen. Hiru egunetako kartelak errepasatuta, galduko ez ditugun zuzenekoen zerrenda osatu dugu.

Ca7riel & Paco Amoroso

Biko argentinarraren lehen aldia izango da Kobetamendin, baita Euskal Herrian ere. NPR irratiaren Tiny Desk izeneko kontzertu akustikoetan biral bilakatu ostean (38 milioi erreprodukzio ditu YouTuben) ezagutu genituen, eta urtebetean mundu mailako ospea eskuratu dute.

Bi musikarien inguruko informazio gehiago nahi baduzu, entzun Kattalin Barcenak ‘B Aldea’n egindako tarte hau.

Ca7riel & Paco Amorosok ostegunean (uztailak 10) joko dute, San Miguel oholtzan, 00:40ean.

HOFE

Gurera etorrita, HOFEk bigarrenez joko du Kobetamendin. 2023ko udan, Amodioa diskoko abestiak kantatu zituen San Miguel oholtzan, uztaila hasierako eguzkipean emandako kontzertu gogoangarrian.

Disko berrian lanean ari den honetan, berriz, oholtzaz aldatu eta BBK Liveko karpan (Johnnie Walker oholtza) emango du zuzenekoa. 

Asteon albiste da nafar artista, Gaztea Kabian ekimenaren baitan, Jimena Amarillorekin atera berri duen “Panpin bat bezala” abestia tarteko.

Ca7riel & Paco Amorosoren zuzenekoa baino bost minutu beranduago hasiko da HOFErena (00:45). 

Biak ikusi nahi badituzu, hona Gaztearen gomendioa: Ikusi argentinarren lehen hiru abestiak eta joan korrika karpara, HOFEren kontzertu ia osoaz gozatzeko.

Amyl and the Sniffers

Punk-rockak toki berezia izango du ostiral iluntzean, Amyl & The Sniffers australiarren eskutik (Nagusia oholtza, 20:55).

“Errukirik gabeko punk espirituala” eskainiko du bandak, Amy Taylor abeslariaren karismak bultzatutako ikuskizun indartsuan. 

AEBetan Foo Fighters eta Weezerrekin biran ibili ostean, Cartoon Darkness izeneko disko berria mundu mailan aurkeztuko dute uda honetan.

Raye

Bigarren eguneko plater nagusienen artean dago Raye britainiarra. 23:20ean joko du, Nagusia agertokian.

Glastonbury jaialdi entzutetsutik itzuli berri, My 21st Century Blues diskoa aurkeztuko du, soul eta dance estiloak uztartuta. Bertara eraman duen bandaren kalitatea ikusita, Bilbon egingo duena ikusteko jakinmin handia dugu.

Sekulako ahotsa izateaz gain, lantzen dituen gaiengatik da ezaguna Raye. Adibidez, emakume artista gisa gorputzarekin eta edertasun kanonekin duen harreman korapilatsuaz aritu izan da musikaria. “Body Dysmorphia” izeneko kantaren emanaldi hau biral bihurtu zen iaz.

Rusowsky

Madrildar musikariaren lehen diskoa, DAISY, Gazteako erredakzioko ikasturte bukaerako soinu bandaren parte da. Bertan, gutxitan entzun dugun estilo askoren fusioa eta Jean Dawson, Las Ketchup, Ralphie Choo, La Zowy eta Ravyn Lenaeren kolaborazioak aurkituko dituzu, beteak beste.

Ainhoa Vitoriak azaldu digunez, zinema, teknologia eta kulturaren alorreko erreferentziaz jositako lana da DAISY. Diskoa zuenean entzun nahi baduzu, ostiralean duzu aukera (uztailak 11), 23:30ean, Repsol oholtzan.

Bad Gyal

Bad Gyalek Nagusia oholtzako publikoa dantzan jarriko du, ostiral gauean (Nagusia, 01:40), “Da Me” hita estreinatu eta egun gutxira.

Musikariak La Joia, bere estreinako disko luzea, kaleratu zuen 2024ko urtarrilean. Albumarekin batera, La Joia: Bad Gyal izeneko dokumentala estreinatu zuen iaz, zinema aretoetan eta streaming plataformetan. Diskoa espainiar Estatuko areto handietan aurkeztu ostean, jaialdietako bira hasi du Bad Gyalek.

Kataluniar artistak bigarrenez joko du Kobetamendin; izan ere, bere ibilbidearen hastapenetan, 2018an, ikusi genuen estreinakoz Bilbao BBK Liveko karpan.

Malko

Malko oñatiarrek 2024ko Gaztea Maketa Lehiaketa irabazi zuten, eta eramandako sari potoloaz gozatzeko aukera izango dute larunbatean (uztailak 12), 17:30ean, Johnnie Walker oholtzan.

Bilbao BBK Liveko azken eguna irekiko dute, larunbateko lehen kontzertua eskainiz. Maketa Lehiaketa zergatik irabazi zuten jakin nahi baduzu gerturatu karpara, ez zaizu damutuko.

Viva Belgrado

Jarraian, rock alternatiboaren zaleek hitzordua izango dute Johnnie Walker oholtzan bertan, Viva Belgrado kordobar taldearen kontzertuan (19:20). Laukoteak post-rock eta hardcorea jorratzen du, 2012tik ondutako diskografia oparoan.

2024an kaleratutako Cancionero de los Cielos LPa da entzun duten azken lana. Bertan aurki daitezke “Perfect Blue” eta “Un Tragaluz” abesti borobilak, beste hainbat kanta interesgarriren artean. Laukotearen lehen aldia izango da Bilbao BBK Liven.

Carolina Durante

Espainiar rock garaikidetik atera gabe, Carolina Durantek hirugarrenez joko du Bilbao BBK Liven. Gaztean etengabe entzun eta jarri dugun Elige tu propia aventura diskoko kantak joko dituzte aurten, 20:15ean, Nagusia oholtzan.

Madrildar bandako kideak Gaztearen saio berezitik igaroko dira kontzertua jo aurretik, jaialdiko talde beterano gisa. Iaz ere gurean izan zen Diego Ibañez, taldeko abeslaria, Kobetamendin aurkeztu baitzuten Barry B artistarekin egindako “Yo pensaba que me había tocado Dios” kanta.

Kylie Minogue

90eko poparen diva ezagunenetarikoak Kobetamendiko Nagusia oholtza beteko du larunbatean (uztailak 12), 22:35ean. Tension II izeneko diskoa gurean aurkezteaz gain, duela 30 urtetik gaur eguneraino pilatu dituen hitez osatutako errepertorioa eskainiko du kanadar artistak.

“Padam Padam” entzun bezain pronto erotzen zaren horietakoa bazara, Kylie Minoguek Kobetamendin emango duen kontzertua esperientzia ahaztezina bihurtuko da zuretzat.

The Blessed Madonna

Aurtengo jaialdia ixteko ardura The Blessed Madonna estatubatuar ekoizle eta queer aktibistarena izango da. Artistak We Still Believe ikuskizuna aurkeztuko du San Miguel oholtzan, 2:30etik aurrera.

Musikatik harago doan showa eskainiko du. Dantzariz inguratuta eta ikus-entzunezko baliabide ikusgarriekin, aniztasuna, drag kultura eta klub musika goratuko dituen zuzeneko ikuskizunaz gozatuko dugu.

Bilbao BBK Liveri buruzko albiste gehiago

Gehiago kargatu