IZAROk ARKITEKTURA diskoaren aurkezpen birako lehen 20 datak iragarri ditu. Irungo Ficoban emango duen lehen kontzertuko sarrerak agortuta, bizkaitar musikariak 20 datako nazioarteko bira egingo du. Besteak beste, Donostia, Bilbo, Donibane Lohizune, Madril, Granada, Bartzelona, Las Palmas, Dublin, Londres eta Bruselan joko du, 2027ko otsaila eta azaroa bitarte.
Urte bukaeran, abenduan, aterako da ARKITEKTURA, IZAROren disko berria. Musikariak RTVEko ‘La Revuelta’ saioan iragarri zuen diskoa, baita haurdun zegoela ere. Bertan, bizitzari leku bat egiteko beharra izan zuen hizpide. Maiatzean jaio zen musikariaren alaba, eta lan berriaren aurkezpena amatasun estreinatu berriarekin uztartuko du artistak.
Diskoari dagokionez, “osotasunaren ernamuina” bilatzen duela aurreratu du musikariaren lantaldeak. Horrela azaldu dute gaur bertan kaleratu duten prentsa oharrean: “Justizia egiteko ekintza, bakea egiteko justizia. Existentzia des-antropozentrizatzeko ahalegina. Indarra, adorea, erresistentzia, basakeria, intentsitatea, erromantzea, sustraia, erresilientzia, bizitzaren kemena, hala eta guztiz ere azaleratzen. Samurtasunaren iraultza. Ulertzea, begiratzea, egotea, bizitzea, izatea. Mundu hobea egin etorriko direnentzat , eta mundu honetarako hobeagoak diren ondorengoak ekarri”.
Donostiako Kursaaleko sarrerak eskuragarri daude dagoeneko.. Besteak, hilaren 12ean (ostirala) jarriko dituzte salgai, 12:00etan, IZAROren webgunean. Iragarritako datez gain, 2027an Europa eta Latinoamerikako beste hainbat hiritan kontzertu gehiago izango direla aurreratu du IZAROren lantaldeak.
