RTVEko Administrazio Kontseiluak Espainiak Eurovision jaialdian parte hartuko ez zuela iragarri ostean, txapelketaren final handia ez emititzeko erabakia hartu dutela jakinarazi dute gaur. Erabaki historikoa da RTVErena, jaialdiak dituen 65 urteetan espainiar telebista publikoak urtero emititu baitu gala.
Gazako genozidioaren testuinguruan, Israel jaialditik kanporatzeko eskakizuna egin zuten Espainiak, Herbehereek, Irlandak, Islandiak, Esloveniak eta beste hainbat herrialdek. Nazioarteko jaialdi historikoak, baina, ez du Israelen kontrako erabakirik hartu, eta maiatzaren 16an ospatuko duten final handiko partaideetako bat izango da.
Erabakiarekin aurrera egite aldera, RTVEko Administrazio Kontseiluak La Casa de la Música saioaren edizio berezi bat prestatu du Eurovisionen finalaren egunerako. Maiatzaren 16a Bakean Elkarrekin Bizitzeko Nazioarteko Eguna dela probestuta, ospedun musikarien emankizunez osaturiko ekitaldi berezia antolatu dute. Besteak beste, Channel Terrero, Guitarricadelafuente, Mónica Naranjo, Manuel Carrasco, Ana Belén, Tony Grox & Lucycalys (Benidorm Festeko irabazleak) eta beste hainbat artista gonbidatuko dituzte oholtza gainera.
