Boga Boga festibalean galduko ez ditugun bost kontzertu

Irailaren 12tik 14ra, jaialdiak Donostia hartuko du. Miramar Jauregiko lorategietan, Easo Plazan eta Dabadaban kokatutako aretoetan, bertako zein nazioarteko musikaz gozatzeko aukera izango da.
Azuleja

2025/09/10 - 16:37

Azken eguneratzea

2025/09/10 - 16:37

Besteak beste, Gotts Street Park, León Benavente, Christian Löffler, Azuleja, Bitter Babe, Elena Barker B2B Beltranz, Henge, Kokoshca, La Niña Jacaranda, Nusar3000, Xenia, Aimarz, Eneritz Furyak, Kiliki, Ke Lepo & Felix Buff, Naxker, Putas Amak, Saguxar eta Tatxers ikusteko aukera izango dugu, hiru gunetan banatuta.

Zerrenda luzea ikusita, honako hauekin osatu dugu Gaztearen gomendio zerrenda.

Azuleja (Miramar, irailak 12)

Aurtengo Bilbao BBK Liven ezagutu genuen, eta bere aura bereziarekin maitemindu ginen. Rabaten jaio eta Madrilen bizi den kantariak proposamen ezin interesgarriagoa oholtzaratuko du, C.R.I.N.G.E. izeneko diskoaren aurkezpenean. Musika esperimentala eta Rosalía, Ralphie Choo eta Rusowsky gustoko badituzu, ez galdu Azuleja.

Saguxar (Miramar, irailak 12)

Ane Segurola irundar musikariaren proiektua da Saguxar. 2024an ezagutu genuen, Sei mila urte diskoarekin. Ambient, dream pop eta elektronika esperimentala uztartzen ditu, entzulea barne mundu konplexu batera eramanaz. Begiak itxi eta Kontxako olatuen soinuarekin dantzatzeko aukera paregabea izango da.

Gotts Street Park (Miramar, irailak 13)

Erresuma Batuko jazz, hip-hop eta soul doinurik garaikideenak entzuteko aukera emango digu hirukoak. Taldeak 60ko hamarkadako kutsua duen atmosfera nostalgiko batean murgilduko gaitu. Euren abestiez gain, Kali Uchis, Celeste eta Mabelekin elkarlanean egindako kantak dituzte.

Elena Barker B2B Beltranz (Dabadaba, irailak 13)

Bi DJ hauek kabina partekatuko dute Egia auzoko Dabadaba aretoan. Elenak estilo psikedelikoa du, broken beats, techno eta trance erritmoekin. Beltranzek, ostera, 90eko eta 2000ko progressive house doinuak nahasten ditu. Bikote honen konbinazioa ez zaizu oharkabean pasako.

Aimarz (Easo Plaza, irailak 13)

Zumarragako gazteak Z izeneko estreinako diskoa zuzenean estreinatuko du larunbatean, Easo Plazan. Gaztean, berarekin “jangeatzeko” irrikitan gaude. Easo Plazatik atera gabe, larunbat eta igandean zehar, Kiliki, Tatxers, Naxker eta gurean entzuten ditugun beste hainbat artistez gozatzeko aukera izango da.

 

Sarrerak

Miramar Jauregiko lorategietako eta Dabadaba aretoko kontzertuak ordainpekoak dira, eta eguneko sarrerak edo asteburu osoko bonoa eskuragarri daude jaialdiaren webgunean. Easo Plazakoak, ostera, doakoak izango dira.

Zure interesekoa izan daiteke

Gehiago ikusi
Publizitatea
X