Kontzertu batean 2,1 milioi ikusle bildu dituen lehen emakumea da Lady Gaga. Estatubatuar artistak maiatzaren 3an hautsi zuen errekorra, Rio de Janeiroko Copacabana hondartzan egindako doako kontzertu erraldoiean. Aurretik, Madonnak zuen errekorra: iaz, 1,6 milioi pertsona bildu zituen leku berean.
13 urte eta gero itzuli da Gaga Brasilera, eta zaleek gogotik babestu dute, inoiz eman duen zuzeneko jendetsuenean. Antzoki greko itxurako 1260 metro karratuko oholtzan, MAYHEM disko berriko abesti gehienak jo ditu musikariak.
Alex Corral bizkaitarra kontzertuan izan da, eta berarekin hitz egiteko aukera izan dugu. Kontzertuan bizitakoa hitz batekin laburtu beharko balu, “eromena” izan zela dio Corralek: “Dena eman du, sekulako energiarekin. Eromena izan da. Bi ordu iraun ditu ikuskizunak, eta Coachellako errepertorioa jo du”. Aurretik, Pabllo Vittar arista brasildarrak berotu zuen giroa, dj set berezi batekin.
Jendetzari dagokionez, errepikatuko ez lukeen esperientzia dela aitortu digu bizkaitarrak: "Kontzertura iritsi aurretik nabaritu genuen hondartzan jendetza pilatzen hasia zegoela, jende asko zuhaitzetara igo zen, zuzenekoa hortik ikusteko. "Shallow" abestia kantatu zutenean, Brasilen sekulako arrakasta duen kanta da, kamerek publikoa enfokatu zuten lehen aldiz eta une horretan konturatu ginen kontzertuaren dimentsioaz". Ikuskizuna hasi aurretik, ura bukatu zela kontatu digu Corralek.
