Baobabs Will Destroy Your Planet taldeko Eymard Uberetagoena “B Aldea”n izan da, taldearen disko berriaren lehen alea aurkezteko. Ez Esan du izena, eta irailean aterako den Bai Esan bildumaren lehen zatia da.
Hiru abestiz osaturiko diskoaren A alde honetan, Nation of Languague, Alvvays eta The National taldeek eragindako soinuak aurkituko ditugula aurreratu digu Uberetagoenak. Gainera, Mikel Salasen ekoizpenak diskoari ehundura berezia eman diola kontu digu. Salas filmetako soinu banden konpositorea da, eta hamar urte baino gehiagoren ostean, ekoizpenerako saltoa ematen animatu da.
Bost urteko isilunearen ostean, “beharrak eta gogoak” agindutako lana dela dio Eymardek. Bitan banatu dute formatu digitalean kaleratuko duten diskoa. A eta B atalen arteko aldeaz galdetuta, lehenengoan “pop bizia” eta bigarrenean “ohikoak baino abesti luzeagoak” aurkituko ditugula aurreratu digu.
Disko berriaz gain, 12 urteko ibilbidean taldeak bizitakoez aritu gara gonbidatuarekin. Britpopa egin nahi zuen gazte talde iruindarraren errepasoa eginez, 2016an Abbey Roaden grabatu zutenekoa aipatu du musikariak. Izan ere, Baobabs Will Destroy Your Planet izan zen Londresko estudio mitikotik igaro zen lehen talde euskalduna. Gainera, ezagutzen ez genuen datu bat eman digu gonbidatuak: Gaztea Maketa Lehiaketan irabazi zuten diruarekin finantzatu zuten bidaia.
