Santiago Motorizado hartu du Julen Idigorasek “B Aldea”n, argentinar musikariak Donostian eta Bilbon emango dituen kontzertuen aitzakian. Bakarkako lehen diskotzat duen El retorno izeneko lana aurkezteko etorri da Euskal Herrira.
El Mató a un Policia Motorizado bandako kidea da Santiago. Orain arte, soinu bandak egiten aritu izan da musikaria, eta urteetan zehar pilatutako abesti propioz osaturiko lana ekarri digu oraingoan.
Diskoa kaleratu aurretik, kanten maketak filtratu zizkioten Santiago Motorizadori: “Lagunekin konpartitu nituen eta norbaitek bildu eta YouTubera igo zituen, nire baimenik gabe. Hasieran haserretu egin nintzen, baina jendearen harrera eta eragin zuena positiboa zela ikusita, egoerarekin adiskidetu nintzen”.
Idazterako orduan, letra malenkoniatsuetarako joera du musikariak. Hala ere, min ematen dioten gaiekin umorea egiteko gaitasuna eta ohitura du Santiagok. Hala, El retornon umorez jorratutako gai sakonak aurkituko ditugu.
Dabadaban jada emandako kontzertuari dagokionez, Donostiako aretoa asko maite duela eta publikoaren harrera beroa izan zela kontatu digu artistak.
