Naxker: “Otsailean kolaborazio bat kaleratuko dugu”

Naxker taldeko Karmele eta Jaione ‘B Aldea’n izan dira, Nori jarriko dizkiozu gure abestiak? izeneko EPa kaleratu eta lau hilabetera. Diskoa jendeari aurkeztuta, harrerarekin pozik daude nafar taldeko kideak. Ostegun honetan, urtarrilak 29, Bilboko Kafe Antzokiko Kutxa Beltzean joko dute, euren lehen ‘sold out’a eginda.

Atarrabiatik datoz Naxkerreko kideak. Hofe herrikideaz galdetuta, lagunak eta gelakide ohiak direla kontatu digute. Karmeleren kasuan, Hoferen arrakasta erabat inspiratzailea izan zen, leku antzekotik zetorren lagun batek musika egin eta arrakasta izan zezakeela ikusi baitzuen.

Taldearen sorreraz ere aritu dira. Atarrabiako talde feministan, jaietan jotzeko talde bila ari zirela, bertan zeuden hainbat emakumek talde bat osatu eta jaietarako jotzeko moduko errepertorio bat prestatzeko konpromezua hartu zuten. Esan eta egin. Ordutik, bi EP kaleratu eta Euskal Herriko hamaika plazatan jo dute.

Bukatzeko, otsailean kolaborazio bat kaleratuko dutela aurreratu digute Naxker taldeko Karmele eta Jaionek.