Mihise: “Bost urte pasatu dira, hemen gaude eta ondo gaude, hori ospatzen gabiltza”

Mihise taldeko Beñat Urteaga eta Antton Aranburu “B Aldea”n izan dira, Ahaldatu izeneko diskoa atera eta astebetera.

Taldekideen bizitzetan izandako aldaketa garrantzitsuei (aitatasuna, bikote harreman berriak, lan aldaketak…) tiraka, aldaketek eman eta kentzen dutenaren inguruko disko bat egin du usurbildar bandak. Aurreko lan luzetik bost urte igaro dira, eta pozik eta ondo daudela ospatu nahi dute Ahaldaturekin. Beldurra eta sufrimendua ere besarkatu dituzte, bizitza den etengabeko aldaketaren parte diren aldetik.

Analogikoan grabatu dute diskoa, zintan, ordenagailurik gabe. “Grabaketa prozesua askoz ere atseginagoa eta naturalagoa” izan dela kontatu digute. Badok atarian kaleratu dute lana, Musikariak Palestinarekin mugimenduari batu eta Spotify alde batera utzita.