Niña Coyote eta Chico Tornado: “Gero eta kasu gehiago egiten diogu gure iritzi propioari”

Niña Coyote eta Chico Tornado “B Aldea”n izan dira, Atea izeneko lan berria aurkezteko. Albuma kaleratu eta gutxira, zuzenean jotzeko aukera izan dute eta pozik daude jasotako feedbackarekin.

Punka, psikodelia eta metala jorratu dituzte azken disko honetan, euren ibilbidean mugarriak izan diren estiloei omenaldia eginez. Eskarmentu handidun banda da Niña Coyote eta Chico Tornado, eta urteekin lanarekiko harreman sanoa lortu dutela kontatu digute. Horregatik, egin eta kaleratzen duten musikarekin bakean egotea lortu eta askeago sortzen dutela dio bikoak.

Diskoko kanten artean “Trash” izeneko kanta korala aurki daiteke. Maika Makovski, Rodrigo Cuevas, Los Zigarros, Bala, Le Ra eta Waxy batu zaizkie, bakoitza bere ama hizkuntzan.

Urtea amaitu bitarte, Atea disko zuzenean entzuteko aukera dezente izango da. Tartean, Iruñean (azaroak 20), Donostian (azaroak 21) eta Gasteizen (abenduak 19).