Lukiek: “Diskoa atera aurretik zuzenekoetan jo ditugu abestiak, nahiago dugu. Aurkezpen ofizialak urteko egunik urdurienak izaten dira, eta ez duzu disfrutatzen”

Lukiek taldeko Josu Ximun Billelabeitiak #3 izeneko disko berria aurkeztu digu, ‘B Aldea’n.

Apirilaren 15ean kaleratu zuen mungiar bandak bere lan berria, eta ordutik jasotako harrera beroa izan dela kontatu digu musikariak. Estudio berean grabatu eta antzeko ideiak landuta ondutako trilogia itxurako ziklo baten bukaera da #3.

Aipatutako trilogiaren unibertso bisualari erreparatuta, Platonen kabernaren mitoan bezala, planoa zabaldu eta urrunagoko perspektiba batetik begiratzeko gonbitea egin digute Lukiek taldeko kideek. Josu Ximunek azaldu duenez, letretan ere mundu oniriko eta surrealista batean murgiltzeko deia egiten dute.

Soinuari dagokionez, jarraikortasuna bilatu duten arren, esperimentazioari ere lekua egin diotela kontatu digu Billelabeitiak. “Diskoan geruza asko daude, baina zuzenekoetarako sintetizatzen saiatzen gara, dibertigarria izateko”, erantsi du. Diskoa ofizialki aurkeztu aurretik bertako abestiak jo dituzte zuzenekoetan, eta jendeak sorpresa faktore hori asko eskertu duela azaldu digu artistak.

Belako taldeko Lore Nekane Billelabeitia eta Cris Lizarragak ere parte hartu dute #3n, baita Sal del Coche taldeko Lizardi eta Adur taldeko Naroak ere.

Sare sozialez galdetuta, elkarrizketatuak aitortu digu ez direla bereziki zaleak. Izan ere, esateko ezer ez dagoenean isiltzearen aldekoak direla azpimarratu du.