Kylie Minogue, Nathy Peluso, Damiano David eta Fat Dog, Kobetamendiko argiak itzali aurretik

Bilbao BBK Livek aurtengo edizioko azken egunari ekingo dio gaur. Arratsaldeko lehen orduan (17:30), Gaztearen Maketa Lehiaketa irabazi duen Malko taldeak Johnnie Walker oholtza irekiko du.

Bilbao BBK Livek gaur itxiko ditu ateak, Kylie Minogue, Nathy Peluso eta Damiano David kartelburu sonatuen kontzertuekin. Hauez gain, larunbateraino iritsi diren zaleek, espainiar rockaz gozatzeko aukera aparta izango dute festibaleko azken egunean, Carolina Durante (Nagusia, 20:15) eta Viva Belgradoren (Johnnie Walker, 19:20) kontzertuekin.

Euskal bandek beteko dituzte jaialdiko lehen orduak, ohiko legez. 17:30ean, Malkok karpan (Johnnie Walker oholtza) joko du. Aurtengo Maketa Lehiaketako irabazleek Gaztearen txapelketa ezaguneko sari potoloaz gozatzeko aukera izango dute Kobetamendin, nazioarteko artistez inguratuta. Gainera, Janus Lesterrek estreinakoz joko du Bilbao BBK Liven, 18:25ean.

L’Impératrice frantziar bandak 70eko rockak inspiratutako synth-pop emanaldia eskainiko du San Miguel oholtzan, Pulsar diskoaren nazioarteko biraren baitan. 

Proposamen alternatiboen ildotik, Heartworms post-punk taldeak (Jojo Orme britainiar artistaren bandak) Johnnie Walkerren joko du, 21:30ean.

Gaua iristean, azken eguneko bi apustu nagusiak ikusiko ditugu Nagusia oholtzan: Kylie Minogue eta Damiano David.

Tension II izeneko diskoa gurean aurkezteaz gain, 90eko hamarkadatik pilatu dituen hitez osatutako errepertorioa eskainiko du Minoguek, 22:35etik aurrera.

Damiano Davidek hartuko dio lekukoa, 01:40ean. Måneskin taldeko abeslari gisa ezagutu genuen italiar musikariak bere bakarkako lehen lana, Funny Little Fears, aurkeztuko digu.

Nathy Pelusok San Miguel oholtza beteko du 00:15etik aurrera. GRASA diskoaren baitako ikuskizuna AEBetan eta Hego Amerikan aurkeztu ostean, Euskal Herriko publikoari erakutsiko dio, estreinakoz.

Ordu bertsuan, 00:15ean, Fat Dog britainiarren rock alternatiboaren zaleak bilduko ditu Johnnie Walker oholtzan. 

2025eko edizioa ixteko, The Blessed Madonna estatubatuar ekoizleak ‘We still believe’ showa eskainiko du San Miguelen, eta Johnnie Walker oholtzan Enigma izeneko festaz gozatzeko aukera izango da, Fucknormal, Mina Galán eta Olvido artisten eskutik.