Bilbao BBK Livek gaur irekiko ditu ateak, Pulp, Ca7riel & Paco Amoroso, Judeline, HOFE eta Kaytranadaren zuzenekoekin

17:00etan hasiko da aurtengo edizioa, 28 gradutik gorako tenperaturekin. Gazteak gertatzen den guztiaren berri emango dizu, 18:00etatik aurrera.

Bilbao BBK Livek Kobetamendi hartuko du ostegun honetan, hiru eguneko programazio ezin oparoagori eusteko. Igande goizaldera arte, nazioarteko zein bertako musikariek Bilbo eta inguruetako publikoa dantzan jarriko dute, estilo eta gustu guztiak bilduko dituen kontzertu programazioarekin.

Pulp, Ca7riel & Paco Amoroso, Judeline, HOFE eta Kaytranada dira festibaleko lehen eguneko kartel buruak. Pulp britainiarrek 70eko hamarkadatik daramatzate nazioarteko oholtzak britpopez betetzen. Ostegun honetan, lehen aldiz joko dute Bilbon.

Ca7riel & Paco Amorosorentzat ere lehen aldia izango da Kobetamendin, baita Euskal Herrian ere. NPR irratiaren Tiny Desk izeneko kontzertu akustikoetan biral bilakatu ostean ezagutu genuen biko argentinarra, eta urtebeteko epean mundu mailako ospea eskuratu du.

Ohiko legez, euskal taldeek irekiko dute programazioa, San Miguel eta Johnnie Walker oholtzetan. Eider Saez (17:30), Mirua (17:45) eta Tatta & Densoren (19:20) zuzenekoak ikusiko ditugu arratsaldeko lehen orduetan.

Michael Kiwanukaren ikuskizunak folkaren munduan murgilduko gaitu, rock eta soul erritmoekin jolasean. 

Folkaren adierazpen berriei tiraka, Maria Arnal kataluniar musikariaren showa ere eguneko proposamen interesgarrien artean dago.

Gaua bukatzeko, BICEPek ikus-entzunezko bidaia ahaztezina eskainiko du, 3:00etatik aurrera.

Urtero legez, Gazteak hitzordu berezia du uztaila hasieran: Bilbao BBK Live musika jaialdia. Hala, lantalde berezi batek jaialdian gertatzen den guztia kontatuko dizue uztailaren 10etik 12ra.

Hiru egunetan, saio berezia egingo dute Alain Perez, Maite Garmendia, Andrea Aranburu, Ibon Fernandez, Sara Alonso eta Julen Idigorasek, 18:00etan hasi eta 22:00ak arte. Festibaleko Nagusia oholtzaren ondoan kokaturiko set berezian, Bilbao BBK Liven joko duten artistak elkarrizketatuko dituzte. Gainera, Kobetamendiko giroarekin zerikusia duten tarteak, erronkak, publikoarekin hartuemanak eta jaialdian entzungo dugun musikaren errepasoa egingo dute egunero, gonbidatu eta kolaboratzaile bereziekin. Saioak streaming bidez izango dira ikusgai, Gaztearen YouTubeko kanalean eta webgunean.

Gaztearen sare sozialetan ere jaialdiaren jarraipen zabala egingo da, egunero. Kontzertuetako unerik onenak bilduko ditugu; baita festibaleko argazkiak, bideoak eta artistei egindako elkarrizketak ere.