125 kultur eragilek diru esleipen publikoetan "gardentasuna eta ekitatea" eskatzeko ekimena abiatu dute

‘Denok gara kultura’ lelopean, kulturarekin zerikusia duten diru laguntza prozesuetan gardentasuna eta ekitatea eskatzeko ekimena abiatu dute hainbat kultur eragilek. Leloaren izena daraman Instagram kontuan plazaratu duten idatzian, “diru publikoa zalantzazko gardentasuna duten prozeduren bidez ematea” gaitzetsi dute. Musikari eta kultur eragile guztien aukera berdintasuna bermatzen ez den bitartean, “erabaki horien bidez bultzatzen ari diren kultur ereduari” buruzko kezka adierazi dute.

Sinatzaileen artean Fermin Muguruza, Hofe, Anari, Denso, Eire, Ezpalak, Esanezin, Merina Gris, La Txama, SÜNE, TOC, Tatxers, Olaia Inziarte, Marte Lasarte, Olatz Salvador, Kaotiko eta beste hainbat artista ezagun daude.

Idatzian irakur daitekeenez, Aurka kolektiboak eta Fermin Muguruzak duela gutxi irekitako eztabaidaren aurrean iritzia emateko beharretik sortu da ekimena. Hala, sinatzaileek kulturara bideratutako baliabide publikoak “gardentasunez, irizpide publikoekin eta kultura sare osorako mekanismo irisgarriekin” kudeatzeko eskaera egin dute.