Gasteizek BatBatean jaialdiaren lehen edizioa hartuko du maiatzaren 15 eta 16an. Jimmy Jazz Ekoizpenakek antolatuko festibala Mendizabalan (Azkena Rock Festival egiten den esparru berean) izango da, eta euskal taldeen aldeko apustu argia egingo du kartelean.
Bi oholtzaz eta bi karpaz osaturiko esparruan, pop, rock, punk eta rap doinuak nagusituko dira BatBateanen. Izen gehiagoren esperoan, honakoak dira jaialdiko antolatzaileek dagoeneko iragarri dituzten artistak: Brigade Loco, Hofe, Metrika, Lukiek, La Txama, La Élite, Añube, Apotheke, Bull Brigade, Hell Beer Boys, Jarfaiter, Nafarroa 1512, Nerve Agent, Roy Ellis, Safu, Santa Salut, Segismungo Toxicómano, Skabidean, Xiberoots, Carlos Perez, K-Style, Malakias Mx3, Malandro eta Rosa Mari.
Lehen iragarpenaren ostean, jaialdiko antolatzaileek sei izen berri eman dituzte jakitera: Mirotz eta Annekdodas gasteiztar bandak, Kaparrak aretxabaletarrak, Sedientos de Cumbia iruindar cumbia taldea, Brava donostiar artista eta DJ Reimy nafarra.
Sarrerak abenduaren 16an izango dira eskuragarri, jaialdiaren webgunean. Bitartean, BatBatean jaialdiaren inguruko berriak jarraitzeko Instagram profila ireki dute antolatzaileek.
