Bad Bunny, Alejandro Sanz eta Ca7riel eta Paco Amoroso izan dira 2025eko Latin Grammy sarietako garaile nagusiak. Las Vegasko MGM Gran Arenan ospatutako ekitaldi handian, Aitana espainiar musikariak bere lehen grammya eskuratu du. Kantarik onenaren sailean, Karol G kolonbiarraren “Si antes te hubiera conocido” saritu dute akademiako kideek.
Galako saririk preziatuena, urteko diskoarena, Bad Bunnyren DeBÍ TiRAR MáS FOToSek eraman du.
Puertorricar artista beste lau aldiz igo da taula gainera, urbano-fusio interpretaziorik onena (“DtMF”), Reggaeton interpretazio onena (“Voy a Llevarte Pa PR), kanta urbano onena (“DtMF”) eta musika urbanoko diskorik onenaren sariak jasotzeko.
CA7riel eta Paco Amoroso argentinarrek ere bost sari eraman dituzte, tartean, musika alternatiboko diskorik onenarena (Papota) eta pop abesti onenarena (“El día del amigo”).
Beste alde batetik, Aitana espainiar artistak bere lehen Grammy Saria eraman du, Cuarto Azul diskoaren diseinuari esker. Akademia eta bere lantaldea aipatu ostean, sendiari zuzendu da musikaria, eta Plex bikotekideari eskaini dio saria.
Alejandro Sanz ere oholtzara igo da bart, bi aldiz, “Palmeras En El Jardin” kanta (urteko grabaketa) eta ¿Y Ahora Qué? diskoa (pop garaikideko disko onena) saritu baitituzte.
Rapahel musikariak 60 urteko ibilbide profesionala saritzen duen garaikurra eskuratu du aurten, urteko pertsonaren grammya.
