Sarrerak, eztabaidaren erdigunean
Atera bezain pronto agortu ziren Bartzelonako ikuskizunerako tiketak, baita Madrilen emango dituen 10 emanaldietakoak ere. Orotara, 600.000 sarreratik gora saldu zituen musikariak, ordu gutxian.
Aurre salmentan izandako zaleen erantzun masiboak Ticketmaster enpresaren sistema kolapsatu zuen, eta sarrera banatzaileek prezio dinamikoen sistema ezartzea erabaki zuten. Azken urtean kritiken ugari jaso dituen mekanismo honen bitartez, enpresek eskariaren arabera aldatzen dute sarreren prezioa. Hala, ‘sold out’ kartela eskegita, Bad Bunnyren showrako tiketak eskura zitezkeen banatzaile ofizialetan, 500 euro inguruan.
Prezioen igoeraz jabetuta, hainbat zalek OCUra (Kontsumitzaileen eta Erabiltzaileen Erakundea) jo zuten, eta erakundeak berretsi du Ticketmasterren neurriz kanpoko salmenta praktiken kontrako salaketa jarri duela.
Bad Bunnyren kontzertuko tiketen salmentan atzemandako gehiegikerien artean, kargu osagarriak, gehiegizko kudeaketa gastuak, derrigorrez ordaindu beharreko donazioak eta abisurik gabeko prezio igoerak nabarmendu ditu OCUk.
Kontsumo Ministerioak, bere aldetik, kontsumitzaileek jarritako salaketa hauek ikertzeko konpromezua hartu du. Hala, Kontsumo Sailak adierazi du ikerketa hau sarreren salmentan diharduten hainbat enpresari irekitako espedientearen baitan txertatuko duela.
Bestalde, kontzertuko sarrera garestienak eskuratu zituzten zaleak kexu agertu dira. Sare sozialetan biral bihurtu den bideoan, Jordi Ferrandez eduki sortzaileak VIP sarrera ordaindu duten zaleen egoera salatu du. Aipatutako bideoan, pilatuta eta mugitzeko aukerarik gabe agertzen dira 500 euroko tiketa erosi duten hainbat pertsona.
