Taylor Swiftek bere ahotsa eta irudia marka gisa erregistratu ditu, AAren okerreko erabileraren aurka babesteko. Bere burua babeste aldera, estatubatuar artistak bi audio eta argazki bat aurkeztu ditu Amerikako Estatu Batuen Marka eta Patenteen Bulegoan.
“Kaixo, Taylor Swift naiz” eta “Kaixo, Taylor naiz” esaldiak zinta batean grabatu eta bi audio horien bitartez erregistratuko du bere ahotsa. Hala, teknologia enpresek Swiften boza erabiltzen dutenean, erregistratutako marka baten erabilera okerra egiten ari direla frogatu eta salaketa jartzeko eskubidea izango du artistak. Irudiari dagokionez, artistak The Eras Tourreko kontzertu batean ateratako argazki ezagun bat gordeko du bere markaren argazki gisa: zutik ageri da, jantzi iridiszente batekin, gitarra arrosa soinean duela, foku morez betetako oholtzan.
AAren eztandatik gaur egunera, Taylor Swift teknologia mota honen biktima izan da, beste hainbat artista ezagunei gertatu bezala. Izan ere, bere irudia eduki pornografikoa sortzeko erabili izan da, baita ohorearen kontrako delitu izan daitezkeen muntaiak egiteko ere. Gainera, 2024ko hauteskunde kanpainan, Donald Trumpen alderdiak AA erabili zuen Swiftek politikari errepublikanoa babesten zuela iradokitzen zuten irudi faltsuak sortzeko.
