Latzen, Alaitz eta Maider, Skatu eta Afu taldeak bueltan, Hatortxu Rocken azken ediziorako

Hatortxu Rockek azken edizioa du uda honetan, uztailaren 24tik 27ra, Lakuntzan. Aurretik iragarritako izenez gain, hitzordu berezirako elkartuko diren hainbat talde ikusteko aukera izango dela aurreratu dute antolatzaileek.
Latzen

Erredakzioa

2025/04/02 - 11:20

Azken eguneratzea:

2025/04/03 - 09:08

Latzen oñatiar talde heavya bueltan da, eta Hatortxu Rocken 30. edizioan joko du, uztailaren 24tik 27ra, Lakuntzan. Gainera, jaialdiko antolatzaileek beste bi izen iragarri dituzte: Alaitz eta Maider, Skatu eta Afu nafar bandak.

1993an sortu zen Latzen, eta duela 2008an utzi zituzten oholtzak. 17 urte beranduago, Hatortxu Rockeko azken ediziora gerturatzen direnek “Laztana” ta “Ze ingo xu” klasikoak entzun eta kantatzeko aukera izango dute.

Alaitz eta Maider oiartzuar bikoteak trikiti-pop erritmoak josi zituen 1989 eta 2004 artean. Bi hamarkada igaro dira eta berriz ere oholtza batera igoko dira, zita berezi honetarako. Iruñeko Burutik taldearekin joko dute.

Skatuk 2007an eman zituen bere lehen urratsak, Iruñean. Zortzi lagunek osatutako bandak ska, punk reggae doinuz bete zituzten Euskal Herriko plazak, hainbat urtez. 2013an atera zuten Lubakitik izeneko azken diskoa, eta bi urte beranduago jotzeari utzi zioten.

Afu Barañaingo salsa-reggae taldea da. 2020an atera zuten azken diskoa, “Larruazalean”. Hiru aldiz egon dira Hatortxun, eta agertokiak utzi eta bi urtera, bueltatzea erabaki dute.

Kartela eta sarrerak

Buitraker, Autobus Magikoa, Never Surrender, Tatxers, Dupla, Skabidean, Chulería, Joder!, Gatibu, Brigade Loco, Non Servium, Sukena, Bulego, La Jodedera, Ibil Bedi, Süne, Kaotiko, Banda Bassotti, Betagarri, Eñaut Elorrieta eta Gozategiren izenak konfirmatu ditu dagoeneko Hatortxu Rockek.

Latzen eta Skatuz gain, 30. edizioarekin azkena joko duen euskal presoen aldeko jaialdiak euskal taldeen itzulera gehiago iragarriko ditu gaurko egunean zehar. 

Hiru eguneko bonoa salgai dago jada, hemen, 105 euroan.

Musika albiste gehiago

Chill Mafiaren azken kontzertua BECen
18:00 - 20:00
ZUZANEAN
Duela  min.
Musika

Agur eta ohore, Chill Mafia

Ostiralean agurtu zituen zaleak Chill Mafiak, bere azken kontzertuan. Bi ordu eta erditik gorako festan, nafar taldeak bere ibilbidean garrantzitsuak izan diren artista guztiak gonbidatu zituen oholtza gainera.

Gehiago kargatu