Bengo oiartzuarra ere batu zen festara, zaleen oihu artean, Kilikirekin duen “Hemengatxik” abesteko. Atzetik etorri ziren Nerve Agent albacetearrak, eta gaueko energia deskarga handiena eskaini zuten taula gainean, “Hombre Clavo”rekin. Iragarrita zeuden Olaia Inziarte eta Amets Aranguren (Ibil bedi) artisten kolaborazioak, eta txalotuenetarikoak izan ziren eszenatokira agertzean. Inork espero ez zuen Oskorriren “Adios, ene esposa” kantatu zuten Flakok, Ametsek eta Olaiak, azken honen gitarrarekin lagunduta.
Oholtzako argiak itzali eta backstagean grabatutako bideo batekin arindu zuten zuzenekoari ekiteko behar zituzten aldaketak egiteko itxaronaldia. Une horretatik aurrera iritsi zen Chill Mafiaren klasikoen txanda: “Kolakao”, “Gazte Arruntaren Koplak” eta Hofe, Irene eta Marcosekin (4:40) abestutako “Barkhatu”.
Ezpalakeko Juanjo eta TOC mungiarrek ere bazuten chilmaren azken zuzenekoan jotzeko gonbidapena. “Hutsa bezain hotza” abestu zuten elkarrekin, nabaritu zen gaueko akats tekniko bakarrarekin (TOCeko Xabiren mikrofonoak huts egin zuen). Gero etorri zen Euskoprincess, eta kontzertuko unerik dantzagarriena eskaini zuen “D1ck P1c” eta “El Moto y La Mota”rekin.
“Ze ederra den nire lagunak hau egiten ikustea” esan zuen Hofek, kontzertuaren gibelean, “Bi esku bi laban”, “El Xokas” eta “Gremlin” (Nueve Desconocidosekin) abestu aurretik. “Mus Corrido” jotzeko, gaueko azken gonbidatuak hartu zituzten: La Txama.
Bukatzeko hiru abesti falta zirenean, eta diskurtsorik prestatuta ez zutela azpimarratu ostean, Flakok eta Kilikik hitza hartu zuten, azken aldiz. “Oso fuertea da, gaur hau utziko dugu. Duela lau urte egin genuen gure lehen kontzertua, Daban, 600 pertsonentzako. Gaur astakeria bat saldu dugu. Mila esker hasieran zeudetenei, eta orain hemen zaudetenei. Duela lau urte ez ginen inor, eta orain ere ez gara inor, baina Last Tourri dirua zor diogu”, oihukatu zuen Kilikik. Flakok, ostera, hitz hauekin eskertu zuen zaleen babesa: “Maite zaituztegu pila bat, super pozik gaude, asko disfrutatu dugu gaurkoa”.
“32014”rekin bukatu zuten kontzertua. Konfeti kanoiak lehertu zituzten, azken bost urte hauetako argazkiak jarri zituzten pantailetan eta azken aldiz kantatu zuten bandaren hita, zuzenera gonbidatutako artista guztiez inguratuta. Bizkaia Arenako publikoak ahotsak urratuta, hunkituta eta eskertuta bukatu zuen zuzenekoa, azken aldiek uzten duten zapore gazi-gozoarekin. Festak aurrera egin zuen, goizaldera arte, Brava, Katza, Bichos Raros eta Puñales dj-ekin.
