Hainbat musikarik The Baboon Show suediar bandaren Bilboko kontzertuari buruzko hedabide digital baten kronika matxista salatu dute. Txema Mañeruk sinatutako albistean, iragan larunbatean oholtzara igo ziren emakumeen arropa “probokatzailea” eta pisua ditu hizpide rock musikan espezializatutako medioak. Urteurren kontzertuan parte hartu zuen Sua talde bizkaitarrak zabaldu du berria, eta hainbat musikarik elkarbanatu dute, elkartasun keinu gisa.
Lodifobia eta matxismoa
Bilboko Santana 27n egindako kontzertu berezian oholtzara agertu ziren artisten errepasoa eginez, honakoa irakur daiteke www.ruta66.es hedabidean: “Svetlanas taldeko abeslari errusiarrak eromena piztu zuen. Pisu apur bat hartu duen arren, ez zen geldirik egon”. Kontzertu bati buruzkoko albiste batean Svetlanas taldeko front womanaren itxura fisikoaren lekuz kanpoko adierazpenaz gain, pisua eta ariketa fisikoa egiteko gaitasunaren arteko lotura lodifoboa egin du kazetariak.
Testu berean, Cecilia Boström The Baboon Showeko abeslariaren janzteko moduaz mintzo da Mañeru, honen arropa eta jarrera sexualizatuz: “Cecilia gaueko protagonista nagusia izan zen, beste behin. Ez zen geldirik egon eta hainbat aldiz aldatu zituen arropa erakargarri eta probokatiboak”.
Sua taldeko kideek salatu dutenez, “frustrazioa eta nazka” eragiten du kontzertuei buruzko halako kronikak irakurtzeak. “Lotsagarria da 2025ean oraindik horrelako zaborra irakurri behar izatea, gure lanari eta benetan axola duenari buruzko kritikak jaso beharrean”, nabarmendu du bizkaitar bandak.
