Imanol Goikoetxea, Gozategi eta La Oreja de Van Goghekin jotzen duen gitarjolea: “Bi kontzertuek dute ukitu nostalgikoa, eta bi publikoak sekulakoak dira”

Imanol Goikoetxea gitarrajolea hartu dugu “GU” saioan. Gozategi taldeko kidea da, Alex Ubagorekin jo izan du eta La Oreja de Van Goghen itzulera biran dabil musikaria.

Donostiar talde ezagunarekin jotzeko deia jaso zuen momentuaz galdetu diote Ibon Fernandez eta Sara Alonsok. Ezustekoan harrapatu zuela kontatu du gonbidatuak, eta hamar bat egun hartu zituela erantzuna pentsatzeko, aldaketa handia baitzen beretzat. Pop musika zale amorratua den aldetik, nerabetan La Oreja de Van Goghen zalea zela kontatu digu Goikoetxeak. Abestiak ezagutzen zituen arren, gitarrarekin ikasteko lana hartu du artistak.

Gozategi eta LODVGen artean dauden antzekotasunez ere aritu da gonbidatua. Errepertorio aldetik nahiko kontzertu nostalgikoak direla kontatu digu: “Bi errepertorioetan abestiek 30 urte dituzte, eta ikusten duzu publikoa nola jartzen den 30 urte dituzten abesti horiekin, eta esaten duzu: “jo, ze “pasada””.

Bi taldeen publikoaz galdetuta, biekin asko disfrutatzen duela dio Imanolek. Gozategin, dantza eta algarak dira nagusi. LODVGen kontzertuetan, ostera, publikoaren kantuen bolumena da deigarriena.