Sofia Machin bakarlaria ezagutu dugu “GU” saioan. Astebete duen “Gure uda” kanta ekarri digu eibartar musikariak.
Maiatzean kaleratuko du Lo que guardé izeneko lehen albuma. Umetatik maite du musika Sofiak. Haur eta nerabetan kanten bertsioak egiten zituen, eta azken urteetan bere kantak sortzeko beharra sentitu du. Hala, Sofia aurretik ezagutzen genuen arren, inoizko proiekturik pertsonalenarekin etorri da estudiora. Bere lehen disko luzea ontzeko, mugikorreko Notak aplikazioan zituen ideia eta melodiak bildu ditu musikariak. Abestiei forma emateko, piano klaseak jaso eta prozesu nahiko bakartian murgildu dela kontatu digu Sofiak.
Letrei dagokienez, bere bizitzako pasarte eta pertsonetan oinarritu da eibartar artista. Hala, musikari berari eta musikaren munduan berarekin murgildu zen umetako lagunari abesten dio, besteak beste. Soinuari dagokionez, Samuraï, Amaia, Olivia Dean eta beste hainbat emakume bakarlari hartu ditu erreferente gisa.
Iragan abenduan egin zuen bere lehen kontzertua, eta laster beste data bat iragarriko duela kontatu digu. Bere helburua kontzertuak ematea dela azpimarratuta, kontratazioa irekita du Sofia Machinek.
