Majadaren bisita izan dugu “GU” saioan. Musikariak bere abesti berria, “Bizitza jarri dantzan”, aurkeztu digu primizian. Basshunterren 2006ko “DotA” abestiaren bertsio euskaldun eta “udatiarra” dela kontatu digu gonbidatuak.
Ekaina bukaeran aterako duen Euskaribe Mix EParen aurrerapen lana da ekarri diguna. 2000ko hamarkada hasierako Caribe Mix bildumen omenez izendatu du horrela diskoa.
Amaia Gajate musikariarekin elkarlanean egindako “Zukin” kantaz ere aritu da Majada. Abestia mugarria izan da artistarentzat, kaleratu eta gutxira, sare sozialetan izandako oihartzuna tarteko, 10.000 entzule berri ekarri baitizkio. Disko berria kaleratuta, udako festetan bere musika entzuteko gogoz dagoela aurreratu digu Majadak.
