AZAX taldeko Unai eta Martin estudioan izan ditugu, “Zu al tzea?” izeneko estreinako kanta gurean aurkezteko. Aspaldiko lagunak dira taldeko bi kideak, eta bi urte daramatzate elkarrekin lanean.
Elektronika eta trikitixa uztartzen ditu azpeitiar bikoak, aurretik erromeria taldeetan ikasitako guztiari beste aterabide bat emanez. Gaztea Maketa Lehiaketari esker ezagutu genituen, 2025eko edizioko aurre finalera iritsi baitziren.
Umoreaz baliatu dira euren proiektua aurkezteko; hala, taldearen sare sozialetan aurkezpen bideo xelebreak igotzen dituztela kontatu digute. Zuzenekoei dagokienez, dibertigarriak eta “jostagarriak” izango direla aurreratu digute. Martxoaren 28an joko dute euren lehen kontzertua, Sanagustin Kulturgunean.
