Iñaki eta Hodei, I.C eta Hodi musikaren munduan, artistak ezagutu dugu “GU” saioan. Beasaindik dator bikoa, eta erro latinoak dituen musika egiten dutela kontatu diote Ibon Fernandez eta Alain Perezi.
Lehengusuak dira bi musikariak, eta musika sortzeko orduan dena eurek egiten dutela kontatu digute. Elektro latinoa, reggaetoia eta ukitu urbanoa duten doinuak uztartzen dituzte, eta “Zu ta Ni” izenekoarekin Beasain eta inguruetako parranda giroa aztoratu dutela jakin dugu.
Dagoeneko kontzertu batzuk eman ditu bikoak, eta musika dantzagarria egiten duten arren, haiek dantza gutxi egiten dutela aitortu digute. Gainera, abesti “sentimentalago bat” grabatu berri dutela aurreratu digute I.C eta Hodik.
