Kala, Zuriñe Hidalgoren proiektu berria: “Jolastu nahi dut, hau ere izan naitekeela erakutsi”

Zuriñe Hidalgo “GU”n izan da, bere bakarkako proiektu berria aurkezten. Kala izenpean, musika berriarekin dator Hesian taldeko abesle ohia.

Duela urte batzuk utzi zituen oholtzak, umetatik mikro aurrean aritu ostean. Abestu gabe egon den arren, argi du bera kantatzera etorri dela mundu honetara, eta iritsi zaiola musikarekin harremana berreskuratzeko unea.

Seiurteren “Barkatu” abestiaren bertsioa da Kalaren lehen kanta. Duela urtebete inguru, autoan kanta entzun eta une katartiko bat bizi izan zuela aitortu digu. “Barkatu”k ireki zion bidea, eta musikari barkamena eskatzeko modu eder gisa bertsioa egitea erabaki zuen.

Aurrerantzean, 80ko hamarkadako pop doinuak berreskuratzeko asmoz datorrela aurreratu digu. Gainera, filosofia aldetik, gauzak erritmo lasaian egin nahi dituela kontatu digu: “Musika kontsumoaren inguruan haurnartzea ondo legoke, eta azkartasun horretatik atera nahi dut. Ez dut erritmo frenetiko horretan sartu nahi, ez dut nahi eta ez dut egingo”.