Putas Amak: “Amatasunak elkartu gintuen eta konturatu ginen guretzako aisia eta espazioa behar genuela”

Putas Amak talde donostiarra ezagutu dugu “GU” saioan, Oihane, Lorea eta Nahikari taldekideen eskutik.

Ez goaz inora izeneko EPa kaleratu dute, eta dagoeneko aurkeztu dute Euskal Herriko areto batzuetan. “Elkartu ginen ongi pasatzeko, guretzat tarte bat izan eta musika egiteko asmoarekin”, azaldu dute. “Amatasunak elkartu gintuen eta konturatu ginen guretzako aisia eta espazioa behar genuela, eta sormenari lotutako zerbait egin nahi genuen”, erantsi dute.

Ahalduntzeko modu bat da “putas amak” izena bera, “hemen egoteko eskubidea aldarrikatzeko” jarria. Musika elektronikoa jorratzen dute, eta oholtza gainean presentzia ikusgarria dute: “Argi geneukan espektakulu pixka bat egin nahi genuela, eta janzkera eta koreografia bereziak prestatu ditugu”.

Inongo pretentsiorik gabe hasi ziren arren, musikarekin lotutako gauza on asko gertatu zaizkiela kontatu digute, baita egindako bidearekin oso pozik daudela ere. Lagunen eta ingurukoen sekulako babesa jaso dute, eta “erreferente ganberroak” izan nahiko luketela esan digute.

ALAIek ekoitzi dizkie kantak, eta oso eskertuta daude egindako lan guztiagatik: “Hiruron erreferente argia da eta berak eman die forma gure kanta guztiei”.