Iñigo Etxezarreta: “2025ean ez dugu joko, baina ostiral honetako zuzenekoan azalduko dugu zein izango den hurrengo erronka”

ETSko Iñigo Etxezarreta “GU”n izan da, taldearen 20. urteurrena ospatzeko antolatu duten kontzertu hirukoitzaren aitzakian.

Dagoeneko eskaini dute Bizkaia Arenan (BEC) ematekoak diren hiru kontzertuetako lehena. Nahiko urduri zegoen arren, dena oso ondo atera zela kontatu digu musikariak. Datorren asteburura begira, pasa den astean ikusitako gauza asko errepikatu diren arren, sorpresa berriak egongo direla aurreratu digu ETSko kideak.

Herrietako jaietan oinarritutako ikus-entzunezko esperientzia prestatu du taldeak ’20 urte Zure Eskutik’ izeneko hitzorduetarako. Aurretik egindako lana sekulakoa izan da, eta egunotakoa ere ez da makala izaten ari. Iragan ostiralerako prestatzeko, Iñigok Iekoran egon zela kontatu digu, gurasoekin, deskonektatzen. Lo asko egin zuen eta kantu klaseetara joan zen. Hala ere, datorren astebururako ez obsesionatzea erabaki du musikariak: ez du ezer egingo.

2025ean geldialdia egingo du arabar bandak, baina ez dira geldirik egongo. Izan ere, Iñigok primizian kontatu digunez, ostiral honetako kontzertuan ETSren etorkizuneko erronken berri emango dute Bizkaia Arenan.

ETBren jarraipena, larunbatean

EITBk zuzenean emango du Bizkaia Arenako ETSren hirugarren hitzordua: martxoaren 22an, larunbata, 21:30etik aurrera. ETB2n, eitb.eus-en, eta PRIMERAN eta GUAU plataformetan izango da ikusgai.

Gainera, aurreko egunetan, En Tol Sarmientoren ibilbidea errepasatu eta Iñigo Etxezarreta buru duen taldea gertutik ezagutu ahal izango dugu, EITBko hedabideek eskainiko duten programazio bereziari esker.