Nøgenek 10. urteurrena ospatzeko kontzertu berezia egingo du Kursaalen, urtarrilaren 3an

Donostiar boskoteak “kutxak bete eta etxea hustu”ko du aipatutako zuzeneko berezian, “hurrengo geltokia” bilatzeko. Sarrerak apirilaren 1ean jarriko dira salgai, 11:30ean.
Nøgen.

Erredakzioa

2025/03/27 - 10:08

Azken eguneratzea:

2025/03/27 - 14:35

Nøgenek kontzertu berezi batekin ospatuko du bere hamargarren urteurrena, Donostiako Kursaalen. 2026ko urtarrilaren 3an izango da zuzenekoa. Taldeak adierazi duenez; zikloz aldatu, orain arteko ibilbidea itxi eta geltoki berriak bilatzeko hitzordua izango da.

Kontzertua iragartzeko  bideo bat grabatu dute, Antton Telleria eta Mikel Oyarzabalekin. Gaztean esklusiban ikusgai duzu dagoeneko!

10 urte plazaz plaza

Banda donostiarrak 10 urte beteko ditu 2026an. Liv til døden izeneko estreinako diskoa kaleratu zutenetik 2023an Åben Cirkel izeneko azkeneraino, Euskal Herriko eta nazioarteko plazak lepo bete dituzte. Azken disko honetan, bai abestietan bai zuzenekoetan ere, etxe bat irudikatzen zuten, eta hori defendatu dute Euskal Herrian zein atzerrian emandako kontzertuetan. Orain, “joateko, dena jaso eta etxea atzean uzteko unea” dela uste dute.

"Inoiz ez dugu jakin nora goazen, baina aukeratu dugu nola eta norekin. Trenak pasa dira, batzuk hartu ditugu, eta beste batzuk ez; azken finean, edozein gaztek bezala, ahal izan dugun moduan egin dugu Aurrera”, dio taldeak plazaratutako oharrak. “Eta orain, 10 urte bete ditugunean, aro honi amaiera ematera behartuta gaude. Kutxak bete eta etxea hustu. Hurrengo geltokia bilatuko dugu”, erantsi dute.

Sarrerak

Apirilaren 1ean, 11:30ean, irekiko da Nøgenen 10. urteurrenaren ospakizunari hasiera emango dion kontzerturako sarreren salmenta orokorra.

Kursaaleko Eszena Kide programari atxikitako pertsonek tiketak aurre salmentan erosteko aukera izango dute, martxoaren 28an (11:00) apirilaren 1eko 11:00ak arte. Sarrerek 25 euroko prezio bakarra dute (-%10 Eszena Kidesentzat) eta Kursaaleko leihatiletan eta www.kursaal.eus webgunean erosi ahal izango dira.

Albiste gehiago, 'Dida!'n

18:00 - 20:00
ZUZANEAN
Duela  min.
Dida

Ostegun Gizeneko “Dida!” berezia, Tolosatik zuzenean

Inauteri giro betean sartuko da Gaztea, gaur goizean, Tolosatik egingo dugun “Dida!” saio bereziarekin. 10:00etan hasi eta 13:00era bitarte, inauterien xarmaz gozatzeko aukera izango duzue gurean.

Gehiago kargatu