Verde Prato hartu dute Sara Alonso eta Ainhoa Vitoriak, “Bitan”en. Bizitza Eztia diskoak eman dionaz, samurtasunaren potentzialaz eta jaso berri duen Musika Bulegoa sariaz aritu da, besteak beste.
Ana Arsuagak eta Verde Pratok komunean dituzten ezaugarriez galdetu diote tolosar musikariari. Eguneroko konbentzioetatik aldendu eta bera “benetan izateko” baliatzen du Verde Prato, inongo mugarik gabe sortzeko.
Donato Dozzy italiar ekoizlearekin elkarlanean egin du Bizitza Eztia, bere azken diskoa. Tolosa eta Erroma bitartean hartu du forma, bi musikarien ikuspuntuak eta egiteko moduak uztartuta.
Ohiko unibertso intimoan murgildu da Verde Prato azken diskoan, geruza berriak gehituta: orain arte baino literalagoak dira letrak, “intimotasunaren zentzu politiko eta kolektiboa” esploratuz. Norberaren bizipenetan soilik ez eta bizi dugun testuinguruaz hitz egiteko premia sentitu du: “Askatasunari edo feminismoari buruz hitz egin nahi baduzu, adibidez, ezinbestekoa da pribilegioak banatzearen inguruan hitz egitea”.
Samurtasunaren indarraz ere aritu da musikaria “Bitan”en. Bere izaera artistikoaren ezaugarri horretaz aritu da: “Delikatua izateak badu generoarekin zerikusia; maskulinitatearen eta patriarkatuaren lengoaiak erritmo bortitza du, beste sentsibilitate bortitzago bat, agian literalagoa da, eta hori haustea interesatzen zait”.
