Sara Zozayak attä izeneko EP berria ekarri digu “Bitan” saiora. Ke Leporekin ekoitzi errepidean entzuteko aproposa den lau kantako EPa, eta bakarka aurkeztuko du jendaurrean.
Ke Leporen lan egiteko moduaz eta elkarrekin sortu duten sormen dinamikaz aritu da donostiar musikaria. Konfiantza eman dio Zozayak, eta soinu “eder eta analogikoa” bueltatu dio Ke Lepok. Erabakiak hartzeko orduan, gauzak gero eta argiago dituela kontatu digu artistak: “Gero eta argiago daukat baiezkoa dela ulertzen dudana; hau da, zerbait arrotza egiten bazait ez dut sartuko”.
Bandarik gabe ariko da musikaria attären aurkezpen biran. “Ez daukat klaketarik, ez daukat inongo araurik, eta hori oso dibertigarria da eta ikasteko aukera berri bat ematen dit”, azaldu digu. Hala ere, beldurra sentitu duela aitortu dio Ainhoa Vitoriari: “Aurreko diskoan egin behar den hori jarraitu nuen, baina konturatu nintzen ez zela %100 ni nitzena, eta hainbat hilabete eman ditut kapak kentzen, egin nahi nuena bilatzen. Beldurra izan dut baneukalako sentsazioa agian ez zela ulertuko edo ondo sartuko, eta oso underground esferara joatekoa”.
Zuzenekoei dagokienez, bidaia gisa planteatu dituela azaldu du musikariak. Bertan, soinuekin, argiarekin, intuizioarekin, esperimentazioarekin eta intentsitatearekin jolasten da Sara Zozaya. Hala, kontzertu guztiak ezberdinak direla kontatu digu, egunean bertan dituen sentsazioen araberan berritzen baitu errepertorioa.
