Süne, ZETAK, Dupla, Olatz Salvador eta Janus Lester dira artista onenaren Gaztea Saria eramateko hautagaiak

Martxoaren 5ean jakingo dugu irabazlearen izena, Euskalduna Bilbaoko Urban Halleko festa handian.

Erredakzioa

2026/02/28 - 11:24

Azken eguneratzea

2026/02/28 - 11:24

Gazteako epaimahaiak Süne, ZETAK, Dupla, Olatz Salvador eta Janus Lester aukeratu ditu 2026ko Gaztea Sarietako artista onenaren garaikurra eramateko hautagai gisa. Datorren ostegunean, martxoak 5, jakingo dugu zeinek eramango duen garaikurra, Euskalduna Bilbaoko Urban Hallen.

Süne

Bere bakarkako ibilbideko lehen lan luzea oparitu zigun SÜNEk 2024 bukaeran: AMAINEMAN. Iazko urtea, diskoa publikoari aurkezten eman du, Euskal Herrian hasi eta Madril, Bartzelona, Oviedo eta Santiago de Compostelaraino.

Pertsonalean ere urte ona izan da musikariarentzat, "Bitan" saioan kontatu zigunez, bere buruarekin harreman osasungarria garatzen hasi da: “Huntzarekin oso epaitua sentitzen nintzen eta Sünerekin askoz gehiago gozatzen dut Euskal Herrian”. Bada, urteetako esperientziaren poderioz, “zeri jaramon egin eta zeri ez” ikasi duela azpimarratu zuen.

ZETAK

Mitoaroen urtea izan da 2025a. Nafarroa Arenan egin zuten lehena, urtarrileko lehen astean. Atzetik etorri ziren lepo betetako Ilunbeko bi datak eta iristear dagoen San Mames.

Urte borobila bukatzeko, Pello Repararazen taldeak aurtengo Korrikaren abestia sortu zuen, Maixux Zugarramurdi eta Erramun Martikorenarekin elkarlanean.

Dupla

De Un Pueblo Llamado Agurain diskoaren uzta jasotzeko urtea izan da arabar bikotearentzat. Euskal Herriko hamaika plazetan aritzeaz gain, Erresuma Batuan eta Finlandian jo dute 2025ean.

Bira ixteko, bi eguneko jaia antolatu zuten Agurainen. Bertan, gertukoez eta zalez inguratuta, “ametsa egia bihurtzea” lortu zuen Duplak.

Olatz Salvador

Zainak Eman diskoa jaiotzen ikusi eta, urtea hasi bezain pronto, gure plazetan genuen Olatz Salvadorren ikuskizun berria. Denetarik gertatu zaio 2025ean: MIN Sarietarako izendatu dute, “Korapilatzen” kantaren bertsio berri bat kaleratu du eta Judit Neddermann kataluniar artistaren ARTEAN diskoan kolaboratu du, musikari eta itzultzaile gisa.

Janus Lester

Jokin Pinatxoren bandak bere bigarren lan luzea, Lore, kaleratu zuen iaz. Pinatxok berak gurean azaldu zuenez, aurrekoa baino disko dantzagarriagoa da Lore, eta hala aurkeztu dute plazaz plaza. Disko gorriak poz andana eman die: birako lehen kontzertuan leporaino betetako Victoria Eugenia Antzokia, Neomak eta Nøgen bidelagunekin oholtza partekatzea eta 50 kontzertutik gorako bira erraldoia.

Zure interesekoa izan daiteke

ETSren ‘KONKISTA’, EZEZEZen ‘Kabakriba’, Merina Grisen ‘ZULOA’, Olaia Inziarteren ‘Zerrautsa’ eta Miruaren ‘MIRUENEA’, Gaztea Sarietan izendatu, disko onenaren kategorian

2025ean kaleratutako lanen artean, bost hauek aukeratu ditu Gazteak. Epaimahaiak aukeratuko du zeinek eramango duen garaikurra, baina gogoratu zuzeneko eta ikuskizun onenaren irabazlea zuk aukeratuko duzula, bozketa bidez.

GAR, Naxker, Maskak, Burutik eta Aimarz dira artista berri onenaren Gaztea Saria irabazteko hautagaiak

Kutxabank Kornerrek babestutako garaikurrak 2025ean ezagutu dugun artista edo talde berria onena sarituko du.

Amaia Miranda, Euskoprincess, HOFE, Mirua eta XSakararen bideoak, bideoklip onenaren kategorian lehiatzeko hautagaiak

“Amak Dio/Entre Mi Sangre y El Llanto”, “Euskañol”, “Morroxko” , “R.A.” eta “YEPA!” abestien bideoklipak dira Gaztea Sarietako bideoklip onenaren kategoriako izendatuak.

Merina Gris eta Gorka Urbizu, Gaztea Sarien zuzeneko emanaldien zerrenda ixteko

“Tesla Bat Zutan” hitaren egileak martxoaren 5eko galan izango dira, Euskalduna Bilbaon. Haiekin batera, Euskoprincess, Hofe eta Jimena Amarillo, IZARO eta Olaia Inziarte eta Nøgen eta Janus Lester arituko dira zuzenean.

HOFE eta Jimena Amarillo, elkarrekin estreinakoz, Gaztea Sarien galan

“Panpin bat bezala” hi-a zuzenean entzun nahi? Martxoaren 5ean izango duzu aukera, Gaztea Sarien galan.

Zuek aukeratuko dituzue Gaztea Sarietako zuzeneko eta ikuskizun onenaren irabazleak, webgune bidezko bozketan

Zuzeneko onenaren kategorian, Merina Gris, Chill Mafia, Olaia Inziarte, EZEZEZ eta Gorka Urbizu dira izendatuak. Ikuskizun onenarenean, ostera, honakoak dira izendatuak: IZAROren ‘cerodenero’, ETSren ‘20 urte zure eskutik’, ZETAKen ‘Mitoaroa’, Fermin Muguruzaren 40. urteurreneko Anoetako kontzertua eta Gatiburen ‘Agur esan barik’.

Euskoprincess, Gaztea Sarietako galako zuzenekoen artean

Sari banaketan, zuzenean abestuko du Hernaniko musikariak, IZARO, Olaia Inziarte, Janus Lester, Nøgen eta iragartzear dauden beste hainbat artistekin.

Janus Lester eta Nøgenek ere joko dute Gaztea Sarien galan

IZARO eta Olaia Inziarteren zuzenekoa iragarrita, Jokin Pintatxoren banda eta Nøgen donostiarrak batu dira kartelera.

IZARO eta Olaia Inziartek Gaztea Sarien galan joko dute

Martxoaren 5ean izango da sari banaketa, Euskalduna Bilbaoko Urban Hallen. Galan joko dute bi artistek, eta ama izan aurreko azken emanaldia izango da IZAROrentzat.

Publizitatea