Bad Gyal, Raye, Amaia, Amyl and the Sniffers, Polo & Pan, Kneecap, Rusowsky eta Baiuca, Bilbao BBK Liven bigarren egunean

Xsakara eta Sal del Coche bizkaitarrek irekiko dute ostirala, Nagusia eta Johnnie Walker oholtzetan. Tenperatura altuekin hasi da eguna, eta arratsaldean alerta laranja dago iragarrita, euri zaparrada handiengatik.

Bilbao BBK Livek aurtengo edizioaren bigarren egunari ekingo dio gaur, Bad Gyal, Raye, Amaia, Polo & Pan, Rusowsky eta Baiuca kartelburuekin. Arratsaldeko lehen orduan Kobetamendira gerturatzen diren lagunek euskal musikarien ikuskizunaz gozatzeko aukera izango dute, XSakara (Nagusia oholtza, 17:30) eta Sal del Cocheren (Johnnie Walker oholtza, 19:20) zuzenekoekin.

Eguneko plater nagusienen artean dago Raye britainiarra. Glastonbury jaialdi entzutetsutik itzuli berri, My 21st Century Blues diskoa aurkeztuko du, soul eta dance estiloak uztartuta. Ondoren, Bad Gyalek Nagusia oholtzako publikoa dantzan jarriko du, “Da Me” hita estreinatu eta gutxira. Kataluniar artistak bigarrenez joko du Kobetamendin; izan ere, bere ibilbidearen hastapenetan, 2018an, ikusi genuen estreinakoz Bilbao BBK Liveko karpan.

Iluntzean, ikus-entzuleek punka, rapa eta poparen artean aukeratzeko parada izango dute Amyl and the Sniffers, Kneecap, Sofie Royer eta Amaiaren kontzertuetan.

Afalostean, Rusowsky madrildar artistak kaleratu berri duen DAISY diskoa aurkeztuko du Repsol agertokian, 23:30ean. Gero, Polo & Panen elektronika tropikalak San Miguel oholtza hartuko du, eta Abhir musikari urbanoak karpa beteko du, ordu berdinean (00:35).

Baiuca galiziar musikariak itxiko du Repsol agertokia, 01:45ean, folklorea eta elektronika garaikidea uztartzen dituen zuzeneko showarekin. Parrandazaleenek bi aukera izango dituzte gaua bukatzeko. San Miguelen, technoaren fanek hitzordua dute Orbital bikoarekin. Erritmo urbanoak, funka, drum and bassa, UK garagea eta reggaetoia nahiago dutenek, ostera, Jugo3000 jaiaz gozatzeko aukera izango dute karpan, Drumme, Kinara eta Nusar3000 DJen eskutik.