Maruxak taldeko kideek sanferminetan egin dieten eraso homofoboa salatu dute. Uztailaren 7ko 3:00ak aldera, bi gizon taldeko bi kide iraintzen hasi ziren, “putos maricones” oihukatuz.
Gero, kristalezko botilak bota zizkietela azaldu dute Maruxakeko kideek. Instagramen zabaldutako mezuan, gertatutakoa salatu eta “eraso hauek existitzen jarraitzen dutela eta benetakoak direla” gogorarazi dute.
Gainera, zaintzarako espazio seguruak sortzeko beharra azpimarratu dute. Mezuarekin batera, Iruñeko Udaleko LGTBI+ zentro publikoak eraso mota hauek salatzeko duen espazioaren inguruko informazioa partekatu du Maruxakek.
Erasoa salatu eta minutu gutxira, Euskal Herriko musikari, aktore eta zaleen babesa jaso dute iruindar bandako kideek.
